'Fake' nga mga relo gisakmit

CEBU, Philippines - Gisakmit sa mga sakop sa Philippine Coast Guard ug Bureau of Customs ang napulo ka mga dagkong bag nga gisudlan og nagkalain-laing klase sa relo, underwear, bra ug accessories sa relo nga gidudahang mga fake gikan sa Cagayan de Oro City nga gidala sa usa ka Indian sakay sa Superferry 12 nga midunggo kagahapon sa buntag diha sa Pier 6 ning dakbayan sa Sugbu.

Gibanabanang mokabat sa P800 mil ang kantidad sa maong mga gituohang kontrabando nga gipanag-iya sa usa ka Sun Jay Kalra, usa ka Indian.

Si Rolando Punzalan nga pangulo sa Coast Guard Central Visayas nga nahinabi sa mga tigbalita nagkanayon nga nakadawat sila og ‘specific report’ nga dunay mga relo nga sakay sa maong barko nga gidudahang mga peke gikan sa Mindanao. Iyang gimanduan ang iyang mga sakop ingon man nakig-alayon sila sa Bureau of Customs aron susihon ang maong report nga iyang nadawat.

Gisugat sa PCG ug BOC ang barko diha sa pantalan pasado alas-7 kagahapon sa buntag ug una nilang nakit-an ang usa ka itom nga dakong bag nga maoy gisudlan sa maong kargamento.

Apan nadiskubrehan nila pagkataudtaod nga duna pay laing siyam ka mga susama ka dagkong bag nga gidala ni Kalra. Tungod sa kabug-at niini ug sa kadudahang lihok sa maong langyaw gisusi kini sa mga awtoridad ug nadiskubrehang pulos relo nga gipanulod og bawnanan sa pagkaon diha sa unom ka dagkong bag. Si Kalra pakyas sa pagpakita og resibo sa mga relo, underwear ug bra hinungdan nga gidala siya sa buhatan sa PCG.

Sa interbyu, si Kalra miingon nga consignment ang paagi niya sa Cagayan de Oro City ug Davao City hinungdan nga wala siyay napakitang resibo kagahapon.Ang mga relo anha unta dad-on diha sa mga stalls sa Colon area nga giingong mga suki na sa maong Indian.

Si Jose Noel Torrecampo, Customs Intelligence and Investigation Service (CIIS) nga nahinabi sa Banat News nagkanayon nga igo ra silang miabag sa PCG human nangayo kanila og tabang kagahapon sa buntag.

Matud pa niya nga sa inisyal nga impormasyon nga nakuha sa PCG mga relo nga fake gikan sa Cagayan de Oro City ang kontrabando.“Among gipangayoan og resibo (Kalra) pero way napakita,” sumala pa ni Torrecampo.

Gidugang niya nga ilang i-turnover una sa ilang buhatan ang nasakmit nga mga relo, underwear ug bra ug ila pa kining sutaon kun pabayron og buhis si Kalra kun makapakita siya og mga resibo sa maong kargamento.

Apan kun mapakyas kini ang BOC mopasaka og kasong kalapasan sa Intellectual Property Rights (IPR) unya anha pa sila moisyu og warrant seizure and detention tungod kay walay mga papeles nga gipakita ang nagpailang tag-iya niini.(/EIM)(BANAT NEWS)