Nadakin-as sa hagdan patay

CEBU, Philippines - Patay ang usa ka 60-anyos nga byudo human kini madakin-as sa hagdanan sa ilang pinuy-anan ug natagak nga nag-una ang ulo ug didto motugpa sa lamesa sa ilang kan-anan niadtong Domingo sa alas 2:00 sa hapon didto sa sitio Patyo barangay Colawin lungsod sa Argao.

Giila ang namatay mao si Saturnino Solatorio, 60, nga matud pa ni PO2 Benjamin Gerozaga sa Argao Police nga nahinabi sa Banat News gikan sa taas ang biktima ug nanaog aron unta moinom og tubig.

Apan sa iyang pagkanaug aksidenteng nadakin-as ang tiil niini sa hagdanan hinungdan nga natagak ug nag-una ang ulo nga mitugpa sa lamesa ug daling gitabang sa mga kabanay apan namatay gyud kini.

Ang pag-umangkon sa maong byudo mitug-an sa mga polis nga sa nakalabay’ng mga adlaw ilang namatikdang sunod-sunod kining gi-atake sa gihambing sakit niini sa dughan.

Ang kapulisan mitambag sa mga kabanay sa pagpaubos sa awtopsiya sa patay’ng lawas aron mahibaw-an ang tinuoray’ng hinungdan sa kamatayon niini   EIM   - (BANAT NEWS)