'Bata-bata' sa drug personality giunay og patay

CEBU, Philippines - Patay ang usa ka lalaki human kini giatangan ug gipusil sa usa ka giilang drug personality niadtong Domingo sa alas-10 sa gabii diha sa sitio Sampaguita sa Villagonzalo 2 sa barangay Tejero ning dakbayan sa Sugbu.

Ang biktima giila sa kapulisan nga mao si Ryan Sumili, 26, samtang ang gitumbok nga suspek mao si Harold Dequitos, 26.

Sa pasiunang imbestigasyon ni SPO1 Victor Ruel Ayuman, PO3 Lou Pagara ug PO2 Julius Regis sa Homicide Section sa Cebu City Police Office (CCPO) nagbutyag nga padulong ang biktima sa balay sa suspek human giteksan niini nga paadtuon kini.

Apan samtang naglakaw giatangan sa suspek ang biktima ug paglabay niini sa tungod kalit lang gipusil ang biktima sa luyong bahin sa ulo, patay na kini pag-abot sa Cebu City Medical Center (CCMC).

Sa gihimong follow-up operation sa mga sakop sa City Intelligence Branch (CIB) pinangulohan ni Chief Insp. Romeo Santander uban sa mga sakop sa Homicide Section, Investigation and Detective Management Branch (IDMB) nadakpan si Dequitos ug nakuhaan og usa ka .380 caliber, dunay magazine ug unom ka buhing bala, ug usa ka .38 revolver nga may lima ka buhing bala. Sa press conference kagahapon si Sr. Supt. Melvin Ramon Buenafe, hepe sa CCPO nagkanayon nga si Dequitos notadong drug personality ug gun for hire sa maong lugar ug nadakpan kini kaniadto apan gi-dismiss ang kaso.

Matud ni Buenafe sigun sa nahipos nilang impormasyon ang biktima ug ang suspek giingong dunay transaksyon sa ginadiling drugas apan nagkaproblema kini ug mao karoy gituohan nilang motibo sa pagpamusil.

Apan si Dequitos dihang gikuhaan og pamahayag sa mga sakop sa media mihimakak sa pasangil ug mitumbok hinuon sa usa ka ginganlan og John Joe ang mipusil sa biktima.

“Dili akoy nagpusil, dili lang ko mosulti kinsa, gihinganlan man kuno og John Joe, gikontrahan ko nila kay gusto silang mawa’ ko diha mao ila ‘kong gidamay, atraso siguro na sila,” matud pa ni Dequitos.

Iyang giangkon nga iya ang maong armas isip proteksyon sa iyang kaugalingon apan iyang gihimakak nga nagsige pa siya og pamaligya’g ginadiling drugas.  EIM - (BANAT NEWS)