CEBU, Philippines - Sigurado nang masulod sa panudlanan sa lalawigan sa Sugbo ang P 62.5 milyones nga Real Property Tax gikan sa mga electric cooperative ug Telecommunications Service Providers human mosaad ang mga hingtungdan nga mobayad na sila sa ilang buhis.
Kining maong pasalig maoy gibuhian sa mga representante sa mga supplier og kuryente ug uban pang serbisyo nga gipatambong sa miting nga gipatawag ni Gobernador Gwendolyn Garcia sa miaging adlaw.
Gibutyag ni Provincial Treasurer Roy Salubre ngadto sa mga sakop sa media nga ang electric cooperative, mga service provider ug uban pa nanumpa sa atubangan sa gobernador nga ilang bayran ang ilang obligasyon sa buhis sulod sa 45 ka adlaw gikan sa bulan sa Abril hangtod sa Mayo 15 ning tuiga.
Nasayran nga ang Camotes Electric Cooperative (CELCO) adunay bayranan nga kapin sa P8milyones , Globe Telecom Inc., himabaw sa P50 milyones , samtang ang Digitel Mobile Philippines Inc. kon Sun Cellular adunay bayronon nga kapin sa P4 milyones .
Midugang si Salubre nga gawas sa nahisgotang mga pribadong kompanya ug kooperatiba misaad usab nga mobayad ang Cebeco 1, 2 ug 3 sa ilang buhis ngadto sa probinsiya kung mahuman na unya ang pag- inventory sa tanan nilang mga propriyedad sa tibuok lalawigan sa Sugbo.
Gawas niini mosamot pa unya og sulbong ang kolektahonong buhis sa lalawigan kun wala pa magdumili sa pagbayad sa ilang buhis ang Mactan Electric Company (MECO) nga dul-an P3 milyones, ug ang National Grid Corporation of the Philippines (NGCP) nga may bayronong dul-an sa P200 milyones.
Miingon si Salubre nga sa ilang pagdumili sa pagbayad mapugos ang gobernador sa pag-subasta sa ilang mga kabtangan aron ibayad ang halin niini ngadto sa lalawigan.
Nunot sa subsob nga pagsingil sa gobernador sa mga bayronong buhis sa nahisgutang mga kompanya, si Salubre mi- padangat sa iyang pasalamat ngadtong Gobernador Garcia. - (BANAT NEWS)