CCTV cam itaod sa bay patigayon

CEBU, Philippines - Tanang balay patigayon sa dakbayan sa Talisay nga may puhonan nga di mokubos sa P1 milyon gimandoan   nga magpataod og close circuit television (CCTV) system.

Kini human aprobahi niadtong Martes sa konseho sa Talisay ang ordinansa nga gipangamahanan ni Bise Mayor Alan Bucao kabahin sa pagbutang og mga CCTV cam sa mga dagkong establisamento sa maong dakbayan.

Tumong niini mao ang dugang pagpalig-on    sa kampaniya sa kagamhanan batok sa kriminalidad pinaagi sa pagkuha og mga ebidensiya batok sa mga kriminal nga masipong sa camera sa akto sa ilang pagpangawat, panglungkab ug uban pang susamang krimen.

Ubos sa maong ordinansa ang tanang business establishment nga adunay minimum capital nga P1 milyon base sa ilang record nga gisumitir ngadto sa Permit and Licensing Office ang gipangayoan nga magtaod og CCTV cam sa ilang balay patigayon. Ubos sa Section 9 sa maong ordinansa, ang dili makatuman niini sa unang higayon makadawat og pahimangno, sa ikaduhang higayon pabayaron kini og multa nga P2,500, ug P3,500 sa ikatulong higayon nga paglapas. (/WC)   - (BANAT NEWS)