CEBU, Philippines - Ang kagamhanan sa Yokohama, Japan mipasalig nga magpadala og mga eksperto dinhi aron susihon ang natak-opan na nga Sanitary Landfill sa barangay Inayawan, dakbayan sa Sugbo
Mao kini gibutyag kagahapon ni Mayor Michael Rama kinsa nagkanayon nga sutaon sa taga Japan ang maong landfill aron makatabang sila sa pagpalambo sa maong lugar.
Kun masulbad ang problema sa maong labayanan sa basura, may kahigayonang maablihan pagbalik ang Inayawan Sanitary Landfill sumala pa sa mayor.
Matud pa ni Rama nga may landfill nga natak-opan didto sa Yokohama kaniadto apan naablihan og balik gumikan kay gigamitan man og mga modernong kahimanan.
Hinuon nagkanayon si Rama nga dili kini madali-dali sanglit mag-agi kini og lapad pa nga mga pagtuon.
Sayo niini mipirma si Rama og Memorandum of Understanding uban sa mga opisyal sa Yokohama sa miaging semana bahin sa gisabotan nilang magpaambitay og nindot nga mga ideya alang sa kalamboan sa tagsa-tagsa nila ka mga dapit.
Usa sa ilang natuki mao ang solid waste management ug gipahibalo ni Rama nga maayo ang paagi sa Yokohama sa paghipos sa ilang mga basura ug nindot kaayo ang ilang pag-alyansa gumikan kay makakuha pa siya og tip nga mahimong ma-apply dinhi sa dakbayan sa Sugbo. - (BANAT NEWS)