Nanguha'g kuwarta gikasab-an naghikog

CEBU, Philippines - Usa ka ulitawo kinsa nauwaw nga gikasab-an tungod kay nanguha og P1,000 nga kuwarta naghikog didto sa Sitio Cambontan, barangay Bolinawan siyudad sa Carcar niadtong Domingo sa alas 3:00 sa hapon.

Ang nagpakamatay mao si Clint Dumo, 30, ulitawo, nga nagpuyo sa nahisgutang lugar.

Si PO1 Jungie Lastimoso sa Carcar City Police Station mibutyag sa Banat News nga ang nakadiskobre nga nagbitay ug wala na magginhawa si Dumo mao ang iyang duha ka mga batang pag-umangkon nga sila si Jaylord Dumo ug Layra Padilla

Nakita usab sa duha ka bata ang pisi nga gihikot sa liog sa ulitawo kansang pikas tumoy didto igaid sa sagbayan sa ilang balay. Sa imbestigasiyon nga gihimo nasayran nga gikasab-an kini sa iyang inahan nga si Alice niadtong Sabado.

Kini human masakpi sa inahan nga nanguha kini og usa ka libo nga kwarta sa iyang shoulder bag nga wala mananghid kaniya.

Nasuko kuno ang inahan kay wala gyud motug-an ang maong ulitawo   kun unsay iyang gigamitan niini sa kuwarta. Unya nakurat nalang sila human hisayri nga naghikog kini. - (BANAT NEWS)