Tanod nga nanglugos nasikop

CEBU, Philippines - Nabalhug sa prisohan kagahapon ang usa ka barangay tanod sa Umapad, sa dakbayan sa Mandaue human kini madakpi sa kapolisan gumikan sa pasangil nga milugos kini sa usa ka 16-anyos nga dalagita sa maong barangay sa miaging adlaw.

Ang suspetsado kansang ngalan gitabonan una sa kapolisan didto hidakpi sa balay sa paryente niini sa dakbayan sa Lapulapu.

Sayo niini ang bayaw nga babaye sa biktima mitug-an kang PO1 Analyn Gapol nga niadtong miaging adlaw namatikdan niini ang biktima nga wala mahimutang sa iyang kaugalingon nga nagpasabot sa kabug-at sa problema niini.

Dihang iyang gipangutana, mitug-an kini nga gipahimuslan sa nahisgotang barangay tanod makaduha ka higayon ug ang labing bag-o mao ang nahitabo niadtong miaging Biyernes sa gabii. Giasoy sa biktima nga gidapit siya sa maong barangay tanod sa gipuy-an niining balay ug didto gilugos siya.

Dugang pa sa biktima nga human siya pahimusli, gihatagan siya niini og P100 nga kuwarta.

Apan gipasidan-an siya nga dili masumbong ngadto ni bisan kinsa.

Si PO1 Gapol nga nahinabi sa DYKC niadtong miaging adlaw mitug-an nga ilang gipaubos sa laboratory test ang maong biktima ug nasuta nila nga positibo gayud nga napahimuslan ang biktima base sa nakita nila sa kinatawo niini.

Busa ang kapolisan mipahigayon dayon og hot pursuit operation batok sa suspetsado apan wala kini nila hiabti sa iyang balay sa barangay Umapad.

Human nila hisayri nga mitago kini sa iyang paryente sa dakbayan sa Lapulapu ila dayong giadto ug didto nasikop nila kini.

Si PO1 Gapol nagkanayon nga karong adlawa ilang ipasaka ang kasong pagpanglugos batok sa maong suspetsado human usab nila mahan-ay ang mga dokumento nga makapalig-on sa kaso nga ilang ipasaka batok niini. (WC)(BANAT NEWS)