Magtiayon gi-buy-bust sa PIB sikop

CEBU, Philippines - Nadakpan sa usa ka buy-bust operation ang magtiayong gidudahang drug pushers sa mga sakop sa Provincial Intelligence Branch niadtong Sabado sa tungang gabii diha sa barangay Matab-ang, dakbayan sa Toledo.

Ang nasikop mao si Elias Halangdon, 40, ug ang asawa niining si Cecelia, mga residente sa nahisgutang dapit.

Usa sa mga sakop sa PIB kinsa nagdumili sa pagpahingan mibutyag nga human sila makadawat og report kabahin sa ilegal nga kalihukan sa magtiayon ilaha kining gipanid-an.

Usa ka asset sa kapolisan ang nagpahigayon og test-buy sa magtiayon pipila ka higayon sa wala pa gipahigayon ang operasyon batok sa mga suspetsado.

Ang maong test buy giingong migawas nga positibo hinungdan nga mga alas 11:00 sa gabii niadtong Sabado ang PIB mipahigayon og buy-bust operation nga miresulta sa pagkasikop sa duha.

Nakuha gikan sa duha ang usa ka gamay ug usa ka dakong pakete sa shabu nga gibanabanang mokantidad og P7,000 ug mga drug paraphernalia.

Matud usab sa operatiba nga ang magtiayong Halangdon giingong giila nga mga drug pushers diha sa ilang barangay ug gikatahong naabot ang operasyon sa lungsod sa Pinamungahan ug Balamban.

Ang tinubdan sa ginadiling drugas sa magtiayon giingong gikan sa dakbayan sa Sugbo. Gisusi usab sa kapolisan kung duna bay pending warrant ang duha kinsa pareho nang gitanggong sa Consolacion Police Station. (BANAT NEWS)