3 ka polis girelibohan

CEBU, Philippines - Sugod kagahapong adlawa pormal nang girelibohan ang tulo ka mga pulis sa Punta Princesa Police Station nga gipasanginlang nangulata sa duha nila ka dinakpan duha na ka semana ang nakalabay. Si Sr. Supt. Melvin Ramon Buenafe, hepe sa Cebu City Police Office (CCPO) mitataw ang tulo iyang gidestino sa Cebu City Public Safety Company (CCPSC) samtang nagpadayon ang imbestigasyon batok kanila.

Kahinumduman nga sila si PO3 Atilano Ferolino, PO1 Alexis Alferez ug PO1 Romeo Ramas pulos nadestino sa Punta Princesa Police Station gipasanginlang nangulata sa ilang dinakpang sila si Roland Tesoro, traysikad drayber taga Pahina San Nicolas ug kaubang si Julie Labiaga, 24, helper sa parlor. Ang duha midangop sa buhatan sa Investigation and Detective Management Bureau -CCPO. Si Buenafe nga bag-ohay lang nahibalik dinhi sa Sugbu gikan miuli sa iyang yutang natawhan tungod sa kamatayon sa iyang inahan, nagkanayon nga ilang hatagan og due process ang tulo.

Giklaro ni Buenafe nga nahibawo gyud ang mga pulis sa patakaran kun duna silay dinakpan ug gidili gyud ang pagpangulata sa mga dinakpan.

Hinuon ang tulo ka mga pulis hugtanong nanghimakak sa pasangil nga ilang gikulata ang duha nila ka dinakpan. (BANATNEWS)