'Suspek' pagpatay sa magtiayon nadakpan

CEBU, Philippines - Nadakpan sa joint operation sa Provincial Intelligence Branch (PIB) ug Naga City Police kagahapon sa alas- 8 sa buntag diha sa barangay Cogon-Pardo ning dakbayan ang usa ka negosyante og spare parts nga maoy gipasanginlang suspetsado sa pagpusil patay sa magtiayon niadtong Domingo sa kaadlawon sa sitio Buyo sa barangay South Poblacion sa dakbayan sa Naga.

Apan ang gibasehan sa kapulisan sa pagdakop ni Victor Sandoy, 34, taga barangay Cogon-Pardo ning dakbayan kini gumikan sa paghupot og armas nga walay lisensya.

Nakuhaan siya og usa ka .45 nga kalibre sa armas nga dunay duha ka magazine nga puno sa bala ug laing 13 ka bala nga gisulod sa ammo box, usa ka silencer,ug duha ka buhing bala sa .38 nga kalibre.

I-ballistic test alang sa cross-matching ang mga bala sa mga armas nga nakuha gikan ni Sandoy sa slugs nga na-rekober diha sa crime scene dihang gipamatay ang magtiayong mga nitibong Ati nga sila si Marjilly ug Junie Albero.

Nagtuo ang kapulisan nga posibleng .45 pistol ang gigamit pagpusil unya gikuha lang ang kabhang o ba kaha revolver ang gigamit sa mamumuno.

Sa press conference kagahapon sa udto, si Sr. Supt. Patrocinio Comendador, hepe sa kapulisan sa probinsya nagkanayon nga positibong giila ug gitudlo si Sandoy sa duha ka saksi, usa niini silingan sa mga biktima ug ang anak sa mga biktima.

Gawas sa duha ka saksi, matud ni Comendador nga dunay ‘dying declaration’ si Junie nga misulti kini sa ilang silingan si kinsa ang mipusil kanila.

Matud niya sukad nila mahibaw-i ang pangalan sa suspek gipanid-an nila ang mga lihok niini.

Ang PIB ug Naga Police nag-andam na sa pagpasaka og kasong double murder batok kang Sandoy ug ang laing kasong illegal possession of firearms and ammunitions ngadto sa Provincial Prosecutors Office.

Si Chief Insp. Ciriaco Larrobis, luyo-luyong hepe sa Naga City Police Station nagkanayon nga sa ilang imbestigasyon milutaw nga tambalan ang magtiayon ug nahimong kustomer ang suspek ug asawa niini.

Matud ni Comendador nakagasto na og dako ang suspek apan giingong wala sila mangaayo sa ilang balatian.

Si Sr. Insp. Mark Gifter Sucalit, luyo-luyong hepe sa PIB midugang nga ilang nahibaw-an nga ang magtiayong Albero mangayo og bayad sa ilang pagpanambal.

Matud ni Sucalit nga kagahapon sa buntag ilang nakit-an ang suspek nga paingon na kining mosakay sa iyang van apan kalit lang midagan pagkakita kanila.

Sa interbyu sa mga tigbalita kang Sandoy kagahapon kini miingon nga wala siyay kalibotan sa maong panghitabo apan giangkon niya nga nagpatambal siya sa magtiayong Albero ug hasta usab ang iyang asawa.

“Wala koy kalibotan ana, oo nagpatambal ko didto peru wa koy ideya, i-prove lang nila. Wala ‘toy bali akong pagpatambal kay naayo na ko sa una,” pamahayag ni Sandoy.

“Naa toy lisensya akong armas, PTCFOR ni-expire na, diha ra to sa akong sakyanan, para depensa ra na sa akong kaugalingon, wala ko modagan,” pagklaro ni Sandoy.

Nagtuo si Sandoy nga gi-frame up ra siya sa maong kaso sanglit siya pirme makit-an didto sa balay sa pamilyang Albero.

“Kadtong hingtungdan itug-an ninyo ang tinuod nga mamumuno oi, para ma-prove nga wala koy sala ana nila. Ako pa man gani ang dako kaayo natabang ana nila,” panawagan pa sa suspek. (BANATNEWS)