TRO sa korte vs STC wa tahora

CEBU, Philippines - Bisan pa man sa gipagawas nga temporary restraining order (TRO) sa Regional Trial Court Branch 19, nga papasohon ang mga tinun-ang gi-ban sa Saint Theresas College High School Department wala kini tumana sa maong tunghaan kagahapon atol na sa commencement exercise.

Tungod niini tumang kauwaw ang gibati sa duha ka mga tinun-an nga miadto gyud unta kagahapon uban sa ilang mga ginikanan apan wala pasudla sa gwardiya tungod kay giingong maoy kamandoan sa tunghaan.

Kagahapong adlawa ang mga tinun-an nga gidid-an sa pagpapaso miadto sa tunghaan nga nag-uniform lamang tungod kay wala man sila hatagi og toga sa tinguha nga sila makapaso.

Ang abogado sa usa sa mga tinun-an nga si Enrique Lacerna mibutyag nga mosang-at sila og contempt batok sa kadagkoan sa STC tungod sa wala nila pagtahod sa mando sa korte.

“ My client chooses to leave the school. I don’t know why they (STC) don’t comply with the order in fact they earlier stated they will abide with the court order,” matud pa ni Lacerna.

Samtang ang legal counsel sa uban pang mga tinun-ang wala papasoha nga si Cornelio Mercado mibutyag sa The Freeman ang igsuong pamantalaan sa Banat News, nga dili nalang sila moduso og contempt tungod kay court order naman ang gilapas sa tunghaan.

Matud pa ni Mercado nga mas malangan ang kaso kun moduso pa sila og laing contempt hinungdan nga ila nalang kini nga isalig ngadto sa korte.

Samtang ang court sheriff nga si Manuel Gimino ug process server nga si Rey Christian Matta nga maoy mihatod sa TRO wala usab pasudla tungod kay giingong maoy kamandoan sa administrasyon sa STC.

Tungod niini, si Gimino nakadesider nga mohimo nalang og report kalabot sa wala pagtuman sa kadagkuan sa STC sa mando sa korte.

Base sa report sa ABS-CBN Central Visayas, ang mga ginikanan sa mga tinun-an nga wala papasoha misaysay nga ang ilang mga anak hilabihan na ka depressed sa nahitabo kanila.

Gani, usa sa mga tinun-an mihimo na og suicide note nga nagbutyag sa iyang mga kasakit ug kauwaw nga gibati tungod sa nahitabo. Ang inahan sa maong bata nabalaka niini.

Ang tigpamaba sa Department of Social Welfare and Development Jaybee Binghay nga nahinabi sa Banat News mipadayag sa iyang gibating kaluoy sa gidangatan sa maong mga bata.

 ‘Kaluoy man na nila, nagsakit akong dughan sa nahitabo nila,” matud pa niini.

Midugang si Binghay nga andam ang ilang buhatan pagtabang kun modangop kanila ang mga ginikanan sa mga tinun-an.

Duha sa mga tinun-ang gidid-ang makapaso kagahapon matud pa nakalapas sa polisiya sa ilang tunghaan tungod sa gi-post nga mga hulagway nila nga nagsuot lang og bikini nga nagkupot og botelya sa bino ug sigarilyo.(/EIM) (BANATNEWS)