Kap gitun-ang kasohan tungod sa ilegal fishing

CEBU, Philippines - Kasong kriminal ug administratiba maoy posibling ipasaka batok sa kapitan nga nasikop human giingong ilegal nga nangisda uban sa iyang 20 ka tawo diha sa kadagatan sa lungsod sa Oslob niadtong miaging Sabado sa kaadlawon.

Si barangay captain Tañeto Luardo, sa barangay Suba sa lungsod sa Samboan nasikop sa mga sakop sa Maritime Police nga nadestino sa lungsod sa Oslob human nasakpang nangisda ginamit ang dakong panagatan duol sa baybayon sa Oslob nga gidili sa balaod.

Ang provincial legal officer nga si Atty. Marino Martinquilla nga nahinabi sa Banat News mibutyag nga nakig-alayon na sila sa kagamhanan sa lungsod sa Samboan kalabot sa kalapasan nga nahimo sa kapitan.

Midugang si Martinquilla nga ilang gipaninguha nga karung umaabot Lunes ila nang masang-at ang legal nga aksyon batok sa kapitan.

Nasayran nga si Gov. Gwendolyn Garcia mimando og legal nga aksyon batok sa kapitan human masayri ang nahimo niining kalapasan.

Samtang si Luardo sa iyang bahin, misaysay sa Banat News nga iya nalang nga paabuton ang legal nga aksyon sa probinsya sa Sugbo.

“ Wala man tay mahimo, ila man na nga balaod magpaabot nalang ta unsa ilang aksyon,” pasabot pa ni Luardo.

Matud pa ni Luardo nga usa unta molihok og legal tan-awon una kun tinuod ba nga dako ang iyang panagatan tungod kay ginagmay ra man gyud ang ilang kuha. (BANATNEWS)