May mga dalang sirad-an tungod sa prosisyon ni Beato Calungsod karon

CEBU, Philippines - Sirad-an og pipila ka oras karong adlawa ang pipila ka dalan sa siyudad sa Sugbo gumikan sa prosisyon sa imahe ni Beato Pedro Calungsod.

Ugma maoy kapistahan ni Calungsod ug giingong himuon usab ang prosisyon nga tambungan sa kapin sa 5 mil ka mga debotos ni Calungsod.

Ang dalan nga tak-opan gikan sa alas-2 sa hapon hangtud sa alas-7 sa gabii naglangkob sa Ranudo St. ug Jakosalem St. samtang ang dalan sa Barangay Ramos sirad-an ang usa ka lane.

Matud pa sa chairman sa City Traffic Office Management Board nga si Sylvan ‘Jack’ Jakosalem nga gituohang kapin sa 5 mil ka debotos ni Calungsod nga gipaabot nga mosaka pa sa tantong pagsibog sa prosisyon sanglit duna pa’y silingang mga dapit sa siyudad ang gipaabot nga manambong niini.

Gitambagan ni Jakosalem ang mga motorista likayan una ang nahisgutang mga dalan aron makalikay sa problema sa trapiko. Matud pa ni Jakosalem nga daghan ang naghinam-hinam sa maong kalihukan ilabi na nga gipaabot nga mamahimo nang hingpit nga santo karong bulan sa Oktubre 21 niining tuiga didto sa Vatican City ang Sugbuanong martir. (BANATNEWS)