Upat ka dinamitero nadakpan

CEBU, Philippines - Upat ka mananagat kinsa naaktohan nga mipabuto og dinamita sa ilang pagpangisda gisikop sa mga sakop sa fish warden sa barangay Caubyan sa isla sa Olango sa dakbayan sa Lapulapu kagahapon sa alas 5:00 pasado sa buntag.

Si PO2 Jagebe Jacaban sa kapolisan sa Presinto 1 sa Lapulapu City Police Office (LLCPO) nga nagbase sa isla sa Olango miila sa mga dinakpan nga sila si David Lumapas, 44, Ronald Inoc, 30, Rodelio Alcaser, 44 ug Diego Siaton, 42 anyos nga pulos molupyo sa Olango.

Matud pa ni PO2 Jacaban nga nasakmit sa kapolisan gikan sa mga dinakpan mao ang 50 ka kilo nga nagkalainlaing matang sa isda nga pinabuthan.

Midugang siya nga ang fish warden sa isla sa barangay Caubyan nga gipangulohan ni Jackson Matbagon maoy midakop sa mga suspetsado uban sa 50 ka kilo nga isda nga gisulod sa mga   kahon.

Dugang pa ni PO2 Jacaban nga naaktohan gyud sa mga sakop sa fish warden ang maong mga dinamitero dihang mao gyuy pag-ulbo sa dinamita niini nga gihapos nila sa bagang duot sa isda 

Diha-diha nanglutaw dayon ang maong mga isda nga nangamatay gumikan sa kakusog sa buto sa dinamita.

Si PO2 Jacaban miingon nga si Matbagon kinsa maoy kapitan sa barangay Caubyan maoy mihatod dayon sa mga dinakpan ngadto sa ilang buhatan uban sa mga ebidensiya nga naglakip sa kinahon nga mga isda ug motor bangka nga gigamit nila sa illegal nga panagat.

Matud pa niya nga ang mga isdang pinabuthan ilang gitugyan ngadto kang Otalando Leyson nga maoy chairman sa City Fish Warden sa dakbayan.

Ang mga dinakpan kasamtangang gibalhog karon sa prisohan samtang giandam ang tukmang kaso nga ilang isang-at batok niini. (WC)  (BANATNEWS)