Pagsalig sa publiko kang Corona mibahar

CEBU, Philippines - Mibahar pag-ayo ang pagsalig sa publiko sa Korte Suprema tungod sa nadiskobrehang   dagkong katigayonan sa labaw’ng mahistrado niini apan wala   makapasabot sa katawhan kung legal ba gyud ang iyang pagbaton niini, matud pa ni Kongresista Luis Gabriel “Luigi” Quisumbing sa ika-unom nga distrito sa lalawigan sa Sugbo.

Matud pa ni Quisumbing nga gawas lang kun moatubang personal si Chief Justice Renato Corona sa impeachment court ug ikapasabot niya sa katawhan ang legal nga tinubdan sa iyang kabtangan, lisud kaayong mahibalik   ang pagsalig sa publiko kaniya ug sa uban pang kauban niyang mga maghuhukom sa labaw’ng hukmanan.

Si Quisumbing kinsa usa sa 188 ka mga magbabalaod nga mipirma sa impeachment ni Corona nagkanayon nga ang kadagko sa kabtangan ni Corona sama sa mga condominium nga ania sa nasud ug sa gawas ug sa kadaghang deposito niyang kuwarta   sa nagkalainlaing bangko nakapatahap sa publiko nga bunga kini sa kalapad sa iyang impluwensya ug sa kagamhanan sa iyang katungdanan.

Alang kang Quisumbing nga ang katungdanan ni Corona ug sa mga kauban niyang maghuhukom sa Korte Suprema dili basta-basta, busa kun dili sila magtinarong sa pagtuman sa ilang katungdanan, mapagan   sa maot nga dungog ang labaw’ng hukmanan sa nasud.

Midugang si Quisumbing nga sa kataas sa iyang katungdanan, angay unta ipakita ni Corona ang iyang kaligdong nga kasaligan gyud unta sa publiko aron ang mahimo niyang desisyon sa mga kaso nga makaabot ngadto sa Korte Suprema katuohan ug dili kaduhaduhaan. Ang impeachment court unya mobalik sa pagbista sa kaso ni Corona sa Mayo 7, 2012.

Samtang nagpadayon ang hearing sa maong kaso, nag-anam usab kadaghan ang mga kamatuoran kalabot sa mga dinagko nga katigayonan ni Corona nga lisud ka depensahan sa iyang mga abogado.

Busa alang kang Quisumbing nga gikinahanglan gyud nga personal nga manubag si Corona sa mga pangutana sa mga maghuhukom sa impeachment court   aron sa makausa pa matin-aw ang iyang ngalan ug mapapas ang pagduda sa katawhan kalabot sa iyang pagkatawo ug pagkupot sa labing taas nga maghuhukom sa nasud karon.(/WC) (BANATNEWS)