Walay pagsaka sa presyo sa palaliton-DTI

CEBU, Philippines - Ang Department of Trade and Industry (DTI) dinhi sa rehiyon mibutyag nga wala pay nabantayang pagsaka sa presyo sa mga palaliton nga posibleng bunga sa pagsaka sa presyo sa petrolyo sa kalibutanong merkado.

Si DTI regional director Asteria Caberte sa pakighinabi sa Banat News kagahapon nagkanayon nga sa ilang weekly monitoring sa pagkakaron walay nabantayang pagtaas sa presyo sa mga palaliton gawas sa sardinas.

Apan ang pagtaas sa presyo sa sardinas sa milabay’ng tulo ka buwan tungod kini sa pag-ban sa pagkuha sa mga isdang Tamban nga maoy himuong sardinas hinuon gilauman kining mous-os og balik ini og libkas na sa ban.

Si Caberte midugang nga bisan sa pagsaka sa presyo sa gasolina wala pa silay nabatyagan nga naapektohan ang presyo sa mga palaliton.

Kahinumduman nga ang DTI usa sa mga ahensiya nga gisusi sa Regional Tripartite Wage Productivity Board (RTWPB) aron mahibaw-an kung duna bay supervening condition o basehan dinhi sa rehiyon aron tugutan ang gipangayong usbaw sa suhulan sa mga mamumuo.

Kini human nga ang Association of Labor Union-Trade Union Congress of the Philippines (ALU-TUCP) miduso og petisyon ngadto sa RTWP-7 sa P90 nga usbaw sa suholan sa mga mamumuo.

Ang ALU-TUCP mibutyag nga ang padayong pagsaka sa presyo sa produktong petrolyo ug ang automatikong adjustment sa rate sa mga serbisyo moresulta gyud sa pagsaka sa presyo sa mga nag-unang produkto.

Kahinumduman nga si director Maria Gloria Tango sa RTWPB nagkanayon nga duna silay gisubay nga polisiya nga kinahanglang walay wage petisyon nga paminawon kung wala pay usa ka tuig gikan sa uwahing wage order.

Ang uwahing Wage Order Number 16 nga P20 nga usbaw sa minimum nga suholan giluwatan niadto palang Septiyembre 22, 2011. (BANATNEWS)