Catholic school gimandoang papasuhon ang 2 gi-ban nga tinun-an

CEBU, Philippines - Mipagawas og temporary restraining order (TRO) ang korte ug mimando sa Saint Theresa’s College High School Department nga papasuhon ang duha ka estudyanteng ilang gi-ban nga makapaso atol sa ilang graduation.

Si Judge Wilfredo Navarro sa Regional Trial Court (RTC) Branch 19 mipagawas og ruling nga nagmando sa maong tunghaan nga di ipahamtang ngadto sa maong mga tinun-an ang ilang silot.

Sa tulo ka pahinang kamandoan, si Navarro lakip sa kinahanglang itugot sa maong tunghaan ang “to join the practice sessions in preparation for the holding of the commencement exercises, to join the march during the processional along with the rest of the graduates during the commencement exercises on March 30, 2012, to have their full names called along with the names of the others when the roll of graduates is announced during the said commencement exercises and to march along with the other graduates to receive their respective certificate or diploma on the stage or podium during the same commencement exercises.”

Gimandoan usab niya ang tunghaan nga trataron ang mga minor pinaagi sa: “kindness and civility befitting true graduates of a respectable institution sans any discrimination for the entire duration of the commencement exercises.”

Ang mga gireklamo sa mga tinun-an mao ang St. Theresa’s College (High School Department), Principal Sister Celeste Ma. Purisima Pe, Mussolini Yap, Marnie Racaza, Kristine Rose Ligot ug Edita Josephine Yu.

Una niini gidid-an sa maong tunghaan ang duha ka mga tinun-ang babaye nga makaapil sa graduation tungod sa giingong na-post nga mga litrato nila sa Facebook nga nagkupot og botelya sa bino ug sigarilyo samtang nagsuot og bikinis.

Ang mga abogado sa mga tinun-an miklarong dakong kalapasan na ang gibuhat sa prinsipal niadtong Marso dihang gipatawag sila niini sa iyang buhatan ug gipangasab-an ug giingong gipangbansagan silang “sluts, drunkards and cheap” nga nakapauwaw sa mga bata.

Matud pa subay sa balaod proteksyonan gyud ang kabataan gikan sa abusong pisikal, emosyonal, ug bisan na sa mga makasakit nga mga pulong. (BANATNEWS)