Ginikanan sa Haponesa mokustodiya sa apo

CEBU, Philippines - Mga ginikanan sa Haponesang giunay sa pagpatay sa iyang bana mibisita sa panimalay diin mahitabo ang krimen ug nagplanong dad-on ang ilang apo ngadto sa ilang nasud.

Buot sa ginikanan ni Kotoka Kagii Denila nga maadto sa ilang kostudiya ang ilang siyam ka buwan nga apong babaye.

Kagahapon ang mga ginikanan ni Kotoka uban ni Japan consul Yushika Haka milantaw sa patay’ng lawas ni Kotoka ug nagdagkot og insenso.

Gibisita usab nila ang balay nga gipuy-an sa magtiayong Kotoka ug sa suspek nga si Dexter Louie Armanio Denila diha sa sitio Sudtonggan, barangay Basak, dakbayan sa Lapu-Lapu diin misugat pa kanila ang kabaho sa dugo.

Kahinumduman nga si Dexter midunggab patay sa iyang asawang Haponesa dihang giingong nagkalalis silang duha tungod kay miuli kining hubog. Ang suspek pabiling nanghimakak sa pasangil.

Sa report sa TV Patrol Central Visayas gikan sa Rolling Hills Funeral Homes ang pamilya ni Kotoka, uban sa mga polis, social welfare personnel ug mga opisyal sa dakbayan sa Lapulapu gipahigayon ang close door meeting.

Karong adlawa i-cremate ang patay’ng lawas ni Kotoka ug ang iyang abo dalhon usab sa iyang mga ginikanan ngadto sa Japan. (BANATNEWS)