182 ka pamilya gilunopan
BACOLOD CITY, Philippines — Mokabat sa 182 ka pamilya sa mga syudad sa Sagay ug Cadiz Negros Occidental ang namiya sa ilang mga pinuy-anan sukad pa niadtong Martes dihang miigo ang dakong baha sa ilang mga barangay bunga sa walay puas nga pagbunok sa uwan.
Sumala pa sa report ni Provincial Social Welfare Officer Liane Garcia ngadto ni Governor Alfredo Marañon Jr. niadtong Miyerkules 119 ka pamilya ang naapektahan sa Brgy. Paraiso ug 40 ka pamilya usab sa Brgy. Fabrica sa Sagay City.
Ang mga naapektahang taga Brgy. Paraiso gipabakwit ngadto sa Central Lopez ug Holy Family, samtang ang taga Brgy. Fabrica gidala ngadto sa ilang barangay hall.
Sa laing bahin, sa Cadiz, 23 ka pamilyang taga Brgy. Tiglawigan, ang gimandoang mobakwit tungod gihapon sa baha. Kasamtangan silang gipapuyo sa Paniquion Elementary School.
Padayon pang gipaabot sa mga awtoridad sa lalawigan ang report kung pila ka pamilya usab ang naapektahan sa Brgy. Luna sa Cadiz City.
Niadtong Miyerkules inanay nang miubos ang gilawmon sa baha ug duna nay mga apektadong pamilya ang namalik sa ilang mga panimalay, matud pa ni Garcia. (BANATNEWS)
- Latest
- Trending
