Misuway'g lugos gidakop

CEBU, Philippines - Gidakop sa mga polis ang usa ka 38-anyos nga lalaking minyo human kini pasanginling misuway unta og lugos sa iyang 17-anyos nga ig-agaw samtang mao lang kini ang nahabilin sa tindahan sa barangay Bugho sa lungsod sa Moalboal niadtong Miyerkules sa alas 10:00 sa buntag.

Matud ni PO1 Romeo Legaspi Jr. sa Moalboal Police Station dihang nahinabi sa Banat News ang biktima nag-inusarang nagbantay sa ilang tindahan nianang tungora dihang miabot ang suspek nga naghukas ug nag-jogging pants.

Giingong mipalit kini og sigarilyo apan kalit nga misulod sa tindahan ug gi-molestiya ang biktima ug tungod sa kahigal niini giingnan pa niini ang biktima og “mogamit ko nimo ayaw pagsaba sa imong mama ato-ato ra ni.”

Dihang naghubo na ang suspek sa iyang jogging pants nakahigayon ang biktima sa pagtukmod kaniya ug nahayang hinungdan nga nakahigayon og dagan ang biktima sa gawas ug misinggit nga nangayo og tabang.

Ang suspek naabtan pa sa mga polis nga naghukas ug naka jogging pants ug ilang gisikop. Kasong attempted rape in relation to R.A. 7610 o Child Abuse ang gikatakdang ipasaka batok kaniya. (BANATNEWS)