Balay sa konsehal gilungkab, 2 nadakpan

CEBU, Philippines - Kapin sa usa ka gatus ka libo nga balor sa mga bulawang alahas ug mahalong butang ang nasakiyo sa gilungkab nga pinuy-anan sa usa ka subdivision sa may El Monteverde Subdivision sa barangay Lamac lungsod sa Consolacion niadtong Miyerkules sa alas 9:30 sa buntag.

Ang nabiktima sa pagpanglungkab mao ang pinuy-anan nga gipanag-iya ni Rosalinda Manggubat, 57, nagpuyo sa maong dapit, apan duha sa upat ka mga gipasanginlang kawatan ang nadakpan.

Ang duha nga dinakpan giilang sila si Harris Mahinay,18 , ug Rotchie Salinas ,18,   pulos nagpuyo sa barangay Pulpogan, Consolacion, gipangita pa sa kapolisan ang laing duha nga sila si Jovan Platidon ug Kevin Tampus.

Sumala pa sa kapolisan nakuha sa grupo mga bulawang kwintas, singsing, bracelets, sapatos, jacket, duha ka bag ug mga t-shirts.

Matud ni PO3 Allen Garciano sa Consolacion Police Station dihang nahinabi sa Banat News ang bana nga si Mardonio Manggubat nga konsehal sa lungsod sa Borbon   maoy nakadiskubre nga gilungkab na ang ilang balay.

Apan duha sa mga kawatan ang nadakpan na sa gwardiya sa subdivision nga si Neilque Sungkal. Matud pa nadala sa duha ka nakaeskapo ang sakong gisudlan sa mga alahas. Nasuta nga giguba sa mga suspek ang padlock sa pultahan ug dihang nakasud na giutingkay niini ang tibuok underground diin gibutang ang mga nahanaw nga butang. (BANATNEWS)