Namadlong gihapsa'g dos por dos

CEBU, Philippines - Usa ka sakop sa task force sa dakbayan sa Talisay gihapsan og dos por dos angol sa usa ka vendor nga iyang gibadlong didto sa sitio Molave, barangay Tabunok sa maong dakbayan niadtong Lunes sa sa buntag.

Ang biktima sa maong hitabo nga wala ika-report ngadto sa kapolisan mao si Antonio Lim, hingkod nga taga barangay Mambaling, dakbayan sa Sugbo nga sakop sa Anti-Vending Sidewalk Taskforce (AVST). Samtang ang suspetsado giila lang sa ngalan nga “Ricky” , usa ka tindero og isda sa Molave.

Si Edwin Nierves, laing sakop sa AVST mibutyag sa Banat News kagahapon nga kasagaran sa mga sidewalk vendor sa Tabunok nangasuko kanila ug gani siya mismo nakadawat na og daghang hulga sa iyang kinabuhi.

Apan matud pa ni Nierves nga igo lang silang mituman sa tahas nga gisangon kanila sa kagamhanan sa siyudad.

Sa wala pa pusposi ang biktima giingong nag-roving kini sa sitio Molave uban sa iyang mga kauban ug namadlong sa mga vendor.

Apan giingong sa pagtalikod niini kalit lang gihapsan sa suspetsado og dos por dos nga kahoy ang iyang buko-buko .

Nahagba sa yuta ang biktima gumikan sa kakusog sa pagbunal, samtang ang suspetsado dali kaayong nakasibat ug wala na mobalik karon sa pagpaninda og isda sa Molave. Nasayran nga nagsugod ang kasuko sa mga vendor ngadto sa kagamhanan sa Talisay dihang gipasirad-an niini ang merkado publiko sa Tabunok. Nausban ang maong kasuko nila dihang gipasirad-an na usab ang Nacario Trade Center tungod sa kapakyas niini paglukat og business permit.

Ang mga vendor nga nangasuko, wala motinda    didto sa Lagtang public market ug anaa sila magtago-tago sa mga aseras sa Tabunok.

Apan ang kagamhanan sa siyudad adunay gisangunan nga mga task force sa pagbadlong sa maong mga vendor aron adto sila maninda sa merkado sa Lagtang.  - BANAT NEWS