Mipatay sa asawang Haponesa gikasohan

CEBU, Philippines - Hingpit na nga gipasaka sa kapolisan kagahapon sa hapon ang kasong parricide batok sa 27-anyos nga bana nga midunggab patay sa Haponesa niining asawa sa sulod sa ilang panimalay sa Saint Dominic Subdivision, sitio Sudtonggan, barangay Basak, dakbayan sa Lapulapu.

Apan usa ka adlaw na human sa insidente pabiling gibarogan sa suspek nga 27- anyos nga si Dexter Louie Denila nga dili siya maoy nagdunggab patay sa asawang si Kotoka Kagii Denila, 32.

Si Denila una nang nangangkong iyang naabtan ang iyang asawa diha sa ilang balay nga may nagtaop nang kutsilyo sa dughan nga iyang giibot ug migawas siya aron mangayo og tabang.

Si Insp. Zenaido “Jun” Pastorfide ang hepe sa Homicide Section sa kapolisan sa maong dakbayan nga nahinabi sa Banat News mibutyag nga napasaka na nila ang kaso diha sa piskalya.

Mapasalamaton si Pastorfide sa kooperasyon sa mga tawo sa maong subdivision kinsa miabag sa kapolisan pagpangita sa suspek kinsa ilang naabtan diha na sa gawas sa subdivision.    Matud pa nga ang kaso gibase sa gipirmahang pamahayag sa katabang sa magtiayon nga si Jupel Baldosano, 18, nga maoy bugtong nakasaksi sa maong krimen kinsa ubos karon sa ilang kustodiya.

Sa pamahayag niini nga gikan pa nga nakig-inom sa mga barkada ang maong suspetsado ug alas-3 pasado na kining nahiuli sa ilang panimalay.

Si SPO1 Manolito Abellanosa sa mao gihapong buhatan miingon nga subay sa giasoy ni Baldosano nga gibati og hilabihang kasuko ang suspetsado ngadto sa biktima dihang dugay nga naablihan ang pultahan.

Ang biktima kinsa maoy miabli sa pultahan matud pa giaway sa suspek hinungdan sa ilang panaglalis ug misangpot sa pagpanunggab.

Matud pa ni Abellanosa nga ang mga tinugyanan sa Department of Justice (DOJ) mibisita na usab kagahapon sa ilang buhatan ug nagkuha na kini sa mga detalye sa pagkatawo ni Baldesano sanglit giplano sa maong buhatan nga ipaubos kini sa witness protection program sa kagamhanan.

Si Pastorfide midugang nga ang siyam ka buwang anak sa magtiayon anaa karon sa kostudiya sa Department of Social Welfare and Development (DSWD).

“Ang DSWD na maoy mo-determine kung kinsa responsableng moamuma sa bata,” matud pang Pastorfide.

Niadtong Lunes sa hapon ang opisyales sa konsulada sa Japan nakigkita na sa kapolisan ug nanghipos og mga dokumento kabahin sa insidente matud pang Pastorfide.

Gitakda usab nga moabot karong adlawa ang ginikanan sa biktima gikan sa Japan. (BANAT NEWS)