PRO-7 full alert sa Semana Santa
CEBU, Philippines - Ipaubos sa full alert status ang kapulisan tibuok Central Visayas karung semana tungod sa nagsingabot nga kasaulogan sa Semana Santa karung sunod semana.
Si PRO-7 Chief Supt. Marcelo Garbo nga nahinabi sa Banat News kagahapon sa udto didto sa Regional Public Safety Battalion (RPSB) sa lungsod sa Sibonga nagkanayon nga kinahanglang magmabinantayon ang kapulisan niining panahona.
Partikular sa gipangandaman sa kapolisan mao ang insurhensiya sa Negros Oriental nga giangkon sa Central Command nga problema pa gihapon.
Iyang gitataw nga sila sa AFP Central Command padayong nagtambayayong sa ilang mga operasyon sa problema sa insurhensya ilabina didto sa Negros.
“The whole region-7, will be on full alert status maybe this coming Saturday or Sunday,” sumala pang Garbo.
Samtang karung semanaha hangtud sa sunod semana si Garbo molibot sa mga police stations sa Central Visayas uban sa pangulo sa Directorate for Integrated Police Office (DIPO) nga si General Jaime Calungsod.
Lakip sa susihon sa duha ka mga dagkong heneral sa kapulisan mao ang mga tourist destination ingon man ang mga hotels kinsa ila usab butangan og K-9 dog. Samtang mohimo usab og inspeksyon si Garbo sa mga terminals ug pantalan karung Miyerkules Santo. (BANAT NEWS)
- Latest
- Trending
