Karong semana santa

CEBU, Philippines - Bus ug minibus obligahong mag-road worthiness test Obligahon sa Land Transportation Office (LTO)-7 ang tanang mga bus operators sa Sugbo pagpaubos sa road worthiness test sa tanan nilang mga sakyanan nga pabiyahion karung Holy Week o Semana Santa.

Kini aron masiguro nga way problema ang mga mobiyahe nga sakyanan aron malikay sa peligro sama sa disgrasya ang bagang duot sa mga pasahero nga mamauli sa ilang mga probinsiya aron mobakasyon.

Matud ni LTO-7 director Raul Aguillus dihang nahinabi sa Banat News kini maoy tumong sa gipatawag niyang tigom sa tanang mga operators karung buntag sa alas 9:00 ang takna diha sa Sacred Heart Center.

Si Aguillus miingon nga ilang pahibaw-on ang mga operators ug sakyanan pasaheroan sa mga activities nila karung Semana Santa.

Nag-una niini ang pag-awhag sa LTO-7 pagpaubos sa road worthiness test sa mga sakyanan ingon man ang pagahimuon nilang mga random drug testing.

Matud ni Aguillus ang random drug testing himuon nila sa mga bus terminals sa Miyerkules Santo nga adlaw naandang magsugod na ang pagpamauli sa bagang duot sa mga pasahero.

Sunod nga random drug testing himuon pagka- Easter Sunday o Domingo sa Pagkabanhaw tungod kay nianang adlawa magsugod na usab og pamalik dinhi sa dakbayan ang mga namakasyon.

Samtang matud ni Aguillus higpitan usab nila ang polisiyang gidili gyud ang overloading sa mga pasaheroan tungod kay usa kini sa hinungdan sa mga disgrasya. (BANAT NEWS)