Pito ka drayber kompirmadong drug users

CEBU, Philippines - Pito ka mga drayber sa pampublikong sakyanan ang nagpositibo sa paggamit gyud og ginadiling drugas samtang nagmaneho subay sa resulta sa gipahigayong comfirmatory test sa kaulohan.

Si Land Transportation Office LTO-7 direktor Raul Aguillus mibutyag dihang nahinabi sa Banat News nga nadawat niya ang resulta sa confirmatory test gikan sa ilang ulohang buhatan niadto lang niaging semana.

Sa resulta sa confirmatory test napamatud-an nga positibo gyud pagamit og ginadiling drugs ang pito ka mga drayber diin upat niini mga taxi drivers, duha ka jeepney drivers ug usa ka drayber sa V-hire.

Matud ni Aguillus ang maong mga drayber unang nagpositibo atol sa gipahigayong roadside drug testing niadtong Pebrero 8 diha sa Imus Road sa barangay Day-as ning dakbayan sa Sugbo.

Atol sa maong random roadside drug testing gisaksihan kini mismo ni Department of Transportation and Communications Undersecretary Virginia Torres.

Matud ni Aguillus tungod niini awtomatikong gi-revoke ang lisensiya sa maong pito ka mga drayber ug dili na sila tugutang makalukat pa og bag-ong driver’s license hangtud nga dili sila mapaubos og rehabilitation sa usa ka accredited nga kompaniya sa gobiyerno. Sila mopresentar unya sa ilang drug rehabilitation certificate aron tugutang makalukat og balik og lisensya.

Laing sagubangong problema sa maong mga badlungong drayber bisan mahuman ang ilang drug rehabilitation mao ang mas mahal nang bayad sa paglukat og bag-ong lisensiya nga moabot na og P10 mil isip silot sa ilang gihimo.

Matud ni Aguillus ang normal nga bayranan paglukat og driver’s license anaa lang sa P700 ngadto sa P800.

Mipasidaan si Aguillus sa mga drayber nga hingusgan pa sa LTO ang mga roadside drug testing sa mga drayber sa pampublikong sakyanan ilabi na karung naghinangat ang Semana Santa.(EIM)(BANAT NEWS)