Margot nangayo'g suporta sa ubang LGU

CEBU, Philippines - Si Konsehal Margarita Osmeña miawhag sa mga silingang buhatan sa lokal nga kagamhanan nga angay mopagamit sa ilang sakyanan aron pasakyan sa mga menor de edad nga napaslak sa Operation Second Chance (OSC) nga motambong og court  hearing. Kini tungod kay matud pa ni Osmeña nga usa lang ka sakyanan ang maayo og kondisyon sa OSC ug may panahon nga dili kini moandar.

Busa kun hiatlan nga maguba ang maong   sakyanan sa panahon nga may court hearing ang mga bata nga anaa sa OSC walay makahatod kanila ngadto sa korte sa lokal nga kagamhanan diin kini pasakai og kaso nga maoy makabara sa kaso ning mga batan-ong makasasala.

Matud ni Osmeña nga usa kini sa hinungdan nganong adunay mga batan-on nga nag-edad na og 18 anyos pataas sa sulod sa OSC. Dugang pa ni Osmeña nga mihimo na usab siya karon og rekomendasyon nga ilain og kuwarto ang milabaw na og 18 anyos ang edad aron dili kini maka-impluwensya sa mga batan-ong sad-an.

Sa 170 ka mga offender nga anaa sa OSC, mokabat sa 90 niini ang dili taga Siyudad sa Sugbo busa dako kaayo og ikatabang ang ubang LGU alang sa ilang mga konstituwente nga anaa sa OSC. Ang mga bata nga anaa sa OSC naggikan sa Barili, Toledo City, Cordova, Lapulapu City, Mandaue City , Danao City ug uban pa.

Nasayran usab nga duha ra ang social worker sa OSC busa ang Department of Social Welfare and Development mipasalig nga modestino og dugang social worker aron mapalapad ang ilang serbisyo  sa pag-atiman sa mga batan-on nga anaa sa OSC. (BANAT NEWS)