Senyor Sto.Niño de Cebu 'moduaw' sa Limasawa

CEBU, Philippines - Ang imahen ni Senyor Santo Niño de Cebu moduaw ngadto sa Limasawa Island sa Southern Leyte karong Marso 30 ug 31 niining tuiga atol sa kasaulogan sa pagpahigayon sa unang Santos nga Misa diha sa lugar 491 na ka tuig ang nakalabay.

Ang imahen sa Balaang Bata mobiya sa Basilica Minore del Santo Niño sa Marso 29, 2012 sa hapon luwan sa barko sa Philippine Navy paingon ngadto sa dakbayan sa Maasin diin mopundo kini sulod sa usa ka adlaw sa maong lugar.

Dunay ipahigayong fluvial parade gikan sa Maasin paingon ngadto sa Limasawa gamit ang barko sa Philippine Coast Guard ug Philippine Coast Guard Auxiliary. Si Padre Tito Soquiño, presidente sa Santo Niño de Cebu Agustinian Social Development Foundation, Inc. (SNAF) nagkanayon nga gihangop sa mga opisyal sa simbahan sa Romano Katoliko ug sa Philippine Independent Catholic Church ang pagduaw sa imahen sa Balaang Bata ug gipanghinaot nga ang maong sitwasyon mahimong kahiusahan sa tinuohang Katoliko.

Ang protestanteng United Christian Churches of the Philippines (UCCP) giingong nagpakita usab og intensiyon nga malakip sa makasaysayanong selebrasyon.

Matud ni Soquiño nga dunay ipahigayong foot procession gikan sa pwerto sa Triana sa Limasawa ngadto sa Magellan’s Cross diin ipahigayon ang selebrasyon pinaagi sa usa ka Santos nga Misa ug dunay ipahigayong re-enactment sa unang pag-abot sa imahen ni Senyor sa maong lugar. Ang nahisgutang re-enactment langkuban kini sa six-gun salute nga maoy isip signal sa pagsugod sa Santos nga Misa ug tulo ka gun salute sa Philippine Navy.

Ang maong umaabot nga Duaw maoy upat na ka higayon nga gihimo sa Senyor Sto. Niño de Cebu Unang mibisita ngadto sa lungsod sa Bien Unido, probinsiya sa Bohol, sunod sa isla sa Olango sa dakbayan sa Lapu-Lapu ug ngadto sa Diocese sa Biliran. - BANAT NEWS