29 ka panimalay sa T. Padilla demolison

CEBU, Philippines - Nabalaka karon ang 29 ka pamilya diha sa barangay T. Padilla gumikan sa planong pag-demolis sa ilang mga panimalay karong bulana.

Sumala pa sa presidente sa T. Padilla Villa Urban Poor Association nga si Paulita Batalona nga gipanag-iya sa usa ka pribadong tawo ang maong yuta.

Nabalaka sila gumikan kay diha na magsalig sa ilang panginabuhian ang ilang mga miyembro ug kung sila abugon na sa tag-iya niini makulban silang tanan og kaldero.

Matud pa ni Batalona nga usa sa nakita nila nga solusyon mao nga paliton na lang unta sa gobiyerno ang maong luna nga dunay gidak-on nga 4,834 metro kuwadrado.

Ang grupo ni Batalona midangop sa Division for the Welfare of the Urban Poor (DWUP) sa miaging adlaw aron mapangitaan og paagi ang ilang problema.

Matud pa niya nga 58 na sila ka tuig nga namuyo sa maong dapit.

Ang pangulo sa Nasudnong Katawhang Kabos (Nakabos) nga si Evangeline Abejo mipadayag nga angayan tabangan ang maong naapektohan nga pamilya.

Sumala pa niya nga lakip sa maapektahan niini ang pagtungha sa mga anak sa mga pamilyang mawad-an og kapuy-an tungod sa demolisyon.

“Ang ato lang panghinaot nga paliton unta ang maong yuta sa siyudad,” matud pa ni Abejo.

Ang siyudad sa Sugbo padayon nga gitun-an ang maong problema.  - BANAT NEWS