Magtiayon gipatay sulod sa balay

CEBU, Philippines - Nabuslot ang bagol-bagol sa bana samtang napisok usab ang mata SA asawa niini kinsa gipamusil patay sa wala hiilhing Kriminal didto sa sitio Boyo, barangay South Poblacion syudad Naga alas 4:00 pasado sa kaadlawon kagahapon.

Ang mga biktima mao sila si Junie Albero nga usa ka drayber sa traysikad ,   ug asawa niini nga si Marjilly Albero, usa ka mananambal.

Sa pakighinabi sa Banat News kang PO2 Ronjie Nadorra sa Naga City Police Station nasayran nadawat nila ang alarma kagahapon sa alas 6:00 pasado sa buntag pinaagi sa usa ka molupyo nga nagpahibawo kanila bahin sa maong hitabo.

Dihang gisusi kini sa kapolisan, ilang nasuta nga may usa ka wala hiilhing tawo nga miadto sa balay sa mga biktima sa alas 4:00 pasado sa kaadlawon kay giingong nagpatambal sa asawa ni Albero.

Apan ang mga silingan nakadungog nga   nagkatinubagay ang kriminal ug ang mga biktima nga misangpot sa pagpamusil.

Human sa pipila ka buto sa armas de fuego nahilom ang sulod sa balay sa mga biktima, samtang dali nga mipahilayo ang kriminal gikan sa maong lugar nga nagsakay sa iyang motorsiklo.

Matud pa ni Nadorra nga ang bana nga si Albero naigo sa ulo samtang ang asawa niini naigo usab sa tuong mata nga maoy hinungdan sa hinanali nilang kamatayon.

Nagduda si Nadorra nga posibling pagdumot ang hinungdan sa maong krimen.

Natahap usab ang kapolisan nga nasuko ang kriminal kay basin nakabayad kini og dako ngadto sa mananambal nga biktima apan wala siya maayo sa iyang sakit.

Apan matud pa ni Nadorra nga ila pang gisusi kun unsa gayud ang motibo sa maong pagpamusil samtang padayon pa nilang gipangita karon ang kriminal.  - BANAT NEWS