Garahian sa puvs susihon sa LTFRB

CEBU, Philippines - Nunot sa mga kalapasan sa overnight parkings sa mga public utility vehicles (PUVs) sama sa mga sakyanang pasaheroan panahon sa kagabhion batok sa mga operators niini, ang Land Transportation Franchising and Regulatory Board mipagawas og kamandoan sa tibuok rehiyonal nga buhatan sa maong ahensya nga higpitan ang pagpatuman sa rekisito sa pagbaton og prangkisa.

Kini naglakip sa garahian alang sa mga sakyanang gikuhaan og prangkisa sa mga operators og bus pasaheroan, jeepneys, taksi ug V-Hires.

Si LTFRB-7 director Ahmed Cuizon mibutyag sa Banat News nga duna nay bag-ong kamanduan gikan sa ilang ulohang buhatan nga nag-obligar sa tanang mga operators nga kinahanglang aduna silay kaugalingong garahian nga kabutangan sa ilang mga unit panahon nga wala kini biyahe ilabi na sa gabii.

Matud ni Cuizon ang maong kamanduan gikan sa ilang ulohang buhatan tungod kini sa daghang mga reklamo sa publiko batok niadtong mga sakyanan nga ipataka lang og parking daplin sa karsada o dalan ilabi na panahon sa hapon ngadto na sa gabii human sa biyahe.

Mipasidaan si Cuizon nga kadtong masakpang nakalapas niining maong direktiba makabayad og multa ug posible pang masuspenso ang prangkisa sa mga unit nga madakpan.

Nunot niini gipahibawo sa direktor nga ning mosunod nga mga adlaw mohimo sila og inspeksiyon sa tanang mga garahian sa mga bus, jeepneys ug taxi operators dinhi sa dakbayan kun paigo ba ang ilang mga unit sa ilang mga garahian.

Susihon sab nila kadtong mga unit nga ipataka lang og parking daplin sa dalan panahon sa gabii. (BANAT NEWS)