Kapitan, 20 ka sakop gidakop tungod sa illegal fishing

CEBU, Philippines - Nasikop ang usa ka barangay kapitan uban sa iyang 20 ka mga sakop tungod sa paglapas sa Municipal Ordinance kalabot sa pagpanagat diha sa kadagatan sa barangay Caceres lungsod sa Oslob kagahapon sa kaadlawon.

Ang nasikop mao si barangay kapitan Taneto Luardo, kapitan sa barangay Suba lungsod sa Samboan ug ang 20 ka giingong iyang mga tripulante sa fishing boat nga FV San Antonio nga gipanag-iya ni Luardo. Sa pakighinabi sa Banat News ni PO2 Rey Angelo Agustin, mibutyag kini nga ang sakop sa Martime Police nga nadestino sa maong barangay maoy nakasigpat sa maong dakong fishing boat maong ilaha kining giduol ug gisitar.

Matud pa ni Agustin upat ka banyerang klaseklase nga isda sama sa tulingan, tamarong ug uban pa nga gibanabanang mokabat sa P12 mil ang nasakmit. Gidudahang ang maong mga isda diha gikuha sa maong panagatan sulod sa gidili nga distansya sa munisipyo gikan sa baybayon.

Si Agustin miingon nga base sa municipal ordinance ang mga dagkong panagatan sama sa FV San Antonio gidid-ang makapanagat sulod sa 20 kilometros gikan sa baybayon sa maong lungsod. Giingong atol sa pagkasikop sa maong panagatan diha kini nagtaktak og pukot 9.6 kilometros gikan sa baybayon sa barangay Caceres matud pa ni Agustin.

Kasamtangang gitanggong ang kapitan sa kapolisan sa maong lungsod samtang nagpaabot kini sa mayor aron magbayad sa iyang multa sa maong salaod. (BANAT NEWS)