Liog gilapsan sa bala kritikal

CEBU, Philippines - Kritikal ang kahimtang sa usa ka lalaki human lapsi ang liog niini sa bala gikan sa armas sa iyang kontra nga mipusil kaniya didto sa sitio Mananga I, barangay Tabunok dakbayan sa Talisay, niadtong Huwebes sa gabii.

Ang biktima mao si Ilsaias Cabanig, taga barangay Linao, sa nahisgutang siyudad, samtang duha sa upat ka mga suspetsado nga mipusil kaniya nailhan nga mao   sila si Maldwin Cabusas, 22, ug Joshua Taberna, 23, pulos nagpuyo sa sitio Crusher, Lawaan III, Talisay.

Sa imbestigasyon nila ni SPO4 Daniel Tarucan, PO3 Ferdinand Pablo ug PO3 Benedicto Lasque, nasayran    nga sa wala pa mahitabo ang pagpamusil, si Cabanig uban sa iyang kapuyo nga si Emmalinda Dalapu, 36, naglingkod sa daplin sa karsada sa lugar nga nahitaboan, dihang kalit lang miabot ang upat ka mga lalaki nga nagsakay og motorsiklo.

Diha-diha sa walay igong hinungdan, giduol ug gisukmag ni Tabera ang biktima hinungdan nga nahagba kini sa yuta, apan imbis mobangon, mipilit kini pagbalik sa yuta    kay gipusil man dayon kini ni Cabusas pinaagi sa iyang .45 kalibre nga pistola.

Nasabak sa usa ka bala ang ubos nga bahin sa walang dunggan sa biktima apan ang bala milapos sa tuong bahin sa iyang liog.

Dali kining gihatod sa kapolisan ngadto sa Talisay   City District Hospital apan gumikan sa katalandugon sa kahimtang, gibalhin kini ngadto sa Vicente Sotto Memorial Medical Center sa dakbayan sa Sugbo.

Si Senior Inspector Errol Francis Deveyra uban nila ni Tarucan, Pablo ug Lasque ug sa mga personnel sa Special Reaction Unit (SRU) mipahigayon dayon og hot pursuit operation batok sa mga suspetsado apan sila ra si Tabera ug Cabusas maoy nadakpan , kay ang duha nila ka mga kauban dali kaayong nakasibat.

 Ang kapolisan padayon pa sa ilang gihimong imbistigasyon sa maong hitabo uban sa pagduda nga pagdumot ang hinungdan sa maong pagpamusil.(/WC)  (BANATNEWS)