Shootout!

CEBU, Philippines - Naangol ang team leader sa kapolisan lakip na ang tawong ilang dakpunon dihang nahitabo ang shootout kagahapon sa buntag ngadto sa sitio Puertobello, barangay Southern Poblacion, San Francisco, Camotes.

Nakaangkon og samad pinusilan sa walang tiil si Insp. Benigno Niemez human nakigpinusilay sa ilang grupo si Ernest Seedney Keeler, 26, lumad nga taga barangay Santo Niño, Kananga , Leyte .

Si Keeler kinsa dunay kasong robbery with homicide nakaangkon usab kini og samad pinusilan sa walang bahin sa iyang liog human si Niemez bisan naunhan ug nasamdan nakabawos og pusil ngadto kaniya.

Si Niemez ug Keeler daling gidala ngadto sa Ricardo M. Maningo Memorial Hospital.

Si Niemez maoy nangulo sa team sa Regional Public Safety Battalion sa Police Regional Office 8 (PRO-8) nga nangita kang Keeler tungod sa warrant of arrest nga giluwatan ni Regional Trial Court (RTC) Judge Apolinario Buaya sa Branch 35 sa dakbayan sa Ormoc batok kang Keeler.

Si PO2 Ronjy Cidro, imbestigador sa San Francisco Police Station mibutyag nga ang operatiba sa PRO-8 daan nang nakig-alayon kanila nga aduna silay operasyon alas 3:00 sa kaadlawon sa maong lugar diin magtagotago ang suspek.

Matud ni Cidro nga dihang ang operatiba nagpaingon na sa hideout ni Keeler ang suspetsado migawas kini sa balay ug dayong pamusil hinungdan sa pagkaigo ni Niemez.

Ang suspetsado kinsa naigo usab sa pagbawos ni Niemez giingong miisa dayon sa iyang mga kamot human maigo sa liog. Nakuha kang Keeler ang usa ka kalibre .45 nga pistola ug usa ka Ingram machine pistol. Si Cidro midugang nga wala silay saktong detalye sa mga ebidensiya nga na-recover tungod kay ang RPSB-8 mao may mipahigayon sa operasyon.

Karong adlawa ang operatiba gikatakdang mobiya balik ngadto sa Leyte aron ipresentar si Keeler ngadto sa korte. (Uban sa report ni Ria Mae Y. Booc sa The Freeman/EIM)  (BANATNEWS)