16 mil kapin ang bukas nga trabaho

CEBU, Philippines - Mokapin sa 16 mil ka bakanteng trabaho ang itanyag sa kagamhanan sa lalawigan ug mga ahensyang lisensyado   pinaagi sa Public Employment Services Office (PESO) Capitol alang sa labing unang Overseas Job Fair niining tuiga   nga ipahigayon sulod sa   Cebu International Convention Center (CICC) sa siyudad sa Mandaue ugmang adlawa.

Kini aron labing makabaton og kahigayonan sa pagpanarbaho ang mga Sugboanon nga walay trabaho ug walay maayong panginabuhi.

Sa labing uwahi nga listahan sa PESO CAPITOL, may 28 na ka lisensyadong recruitment agency ang motanyag og mga trabaho alang sa mga factory worker nga makatrabaho didto sa nagkadaiyang   mga nasud sa gawas.

Si Capitol Consultant Dr. Mathea Baguia nagkanayon nga ang maong Overseas Job Fair, idalit usab ang ONE STOP SHOP sa mga ahensiya nga mo-issue og mga dokumento ug uban pang panginahanglan sa panarbaho sa gawas sa nasud.

 Kini naglangkob sa NBI, DFA, NSO, SSS, PHILHEALTH ug PAG-IBIG.

Gipaabot nga daghan na usab ang kahatagan og trabaho ngadto sa gawas sa nasud tungod sa nahisgutan nga OVERSEAS JOB FAIR. (BANATNEWS)