CEBU, Philippines - Mopasaka og kaso ang pangulo sa kapulisan sa Central Visayas batok kang Supt. Vicente Mersan Premne kinsa una nang mipadayag nga mopasaka siya og kaso batok sa duha ka mga dagkong opisyal sa kapulisan sa rehiyon siyete.
Si Chief Supt. Marcelo Garbo sa pakighinabi niini sa mga tigbalita kagahapon sa udto diha sa Parklane Hotel atol sa tigom sa National Joint Peace and Security Coordination Center (NJPSCC) nagkanayon nga iya nalang gipinalisar ang pormal nga reklamong ‘disobedience’ batok kang Premne.
Nasayran sa miaging semana mibahad si Premne nga iyang pasakaan og kasong administratiba ug kriminal sila si Garbo ug ang Deputy Regional Director for Administration nga si Chief Supt. Samuel Yordan.
Kini gumikan sa pasangil ni Premne nga wala siya pasudla sa iyang quarters diha sa PC Hills sa barangay Lahug diin anaa magpuyo ang iyang mga anak.
Si Premne nga dugay nang nadestino sa Sugbu ug nabalhin sa Campo Crame ug atua na madestino karon sa Zamboanga City mireklamong gibabagan sa mga sakop sa Regional Public Safety Battalion diha sa gate sa PC Hills ug wala siya pasudla.
Rason ni Garbo nga overstaying na si Premne diha sa PC Hills ug labaw sa tanan dili na siya sakop sa Police Regional Office-7 ug wala nay katungod ang iyang pamilya nga mopuyo pa diha sa PC Hills.
Matud ni Garbo nga human sa hitabo iya dayong gipahibawo ang Campo Crame sa gibuhat ni Premne. Ang pamilya ni Premne mibiya na sa quarters sa PC Hills.
Nagtuo si Garbo nga posibling mataktak pa sa serbisyo si Premne niining iyang kasong iyang ipasaka. Apan mitambag si Garbo ni Premne nga mas maayo pang sundon nalang niini kun unsay pinasikad sa kamanduan diha sa PC Hills sanglit usa kini ka opisyal sa kapulisan ug nahibawo kini sa mga patakaran diha sa quarters sa PC Hills nga ang mga regional staff ra gyud sa PRO-7 ang gitugotang makapuyo uban sa ilang pamilya.
“Most likely I believe he will be dismissed with this kind of behavior,” pasabot pang Garbo sa gibuhat ni Premne sa miaging semana. (BANAT NEWS)