Suspek sa masaker nadakpan

CEBU, Philippines - Gitumbok nga suspetsado sa masaker sa miaging tuig diha sa barangay To-ong, bukirang barangay sa dakbayan sa Sugbu ang nadakpan sa kapulisan ug mga tanod kagahapon sa alas-2 sa kaadlawon gawas sa ilang balay kinsa nakuhaan og armas nga walay lisensya. Ang mga sakop sa Cebu City Public Safety Company (CCPSC) nga nadistino sa bukirang lugar dinhi sa Sugbu, armado og warrant of arrest nga giisyu ni Judge Wilfredo Navarro sa Regional Trial Court Branch 19 niadtong Pebrero 8 nga kasong murder ug duha ka frustrated murder batok ni Efren Sabal,44.

Si Sabal maoy usa sa gitumbok nga suspetsado sa masaker diin usa ang patay ug duha ang naangol sa barangay To-ong niadtong Agosto 20 sa alas-4 sa hapon.

Atol sa hitabo, patay diha dayon si Vivencia Bacalso nga usa ka broker og yuta ug barangay secretary sa naasoy’ng barangay ug naangol usab ang duha nga sila si Angeles Bacalso,anak sa namatay ug Louie Bentua. Si Supt. Reycel Carmelo Dayon, hepe sa CCPSC nga nahinabi sa Banat News nagkanayon nga ang kauban ni Sabal nga hangtud karun pabilin pang gawasnon mao si Willy Savilla nga taga sitio Maguillamon sa barangay Jaclopan sa dakbayan sa Talisay.

Matud ni Dayon nga alas-11 sa miaging gabii gisugdan ang operasyon batok sa suspek human sila makadawat og impormasyon nga miuli kini sa ilang balay human molayas sa miaging tuig.

Nakuha kang Sabal usa ka .45 pistol nga may upat ka buhing bala sulod sa magazine niini.

“Wala ni siyay klarong trabaho pero base sa report ‘hired killer’ ni siya (Sabal) morag bangi sa yuta ang hinungdan ani pero wa ma-establish kinsa ang nagsugo ani nila,” sumala pa ni Dayon.

Si Sabal dihang gikuhaan og reaksyon mihimakak sa pasangil kabahin sa masaker tungod kay duna kini mga testigos nga makapamatuod nga didto siya naghatud og lubong sa minatay sa Pardo nianang mga orasa ug adlawa.

Hinuon andam niyang atubangon ang kaso bahin sa ilegal nga armas nga matud pa niya kaniadto iyang gitipigan isip depensa sa kaugalingon tungod kay aktibo siyang sakop sa Kadre nga kontra komunista. (BANATNEWS)