CAFGU gi-ambush sa Negros or patay

DUMAGUETE CITY, Philippines  – Patay ang usa ka sakop sa Civilian Armed Auxiliary (CAA) sa Armed Forces of the Philippines (AFP) human kini gibanhigan sa bukirong barangay sa Milagrosa sa lungsod sa Sta. Catalina, Negros Oriental kagahapon.

Ang biktima giilang si Vicente Deliña, sakop sa 12th Citizens’ Armed Forces Geographical Unit (CAFGU) Battalion nga nadestino sa 79th Infantry Battalion sa Philippine Army nga nagbase sa Siaton, Negros Oriental.

Sa pasiunang imbestigasyon nasuta nga si Deliña nagpakaon sa iyang kabahin sayo sa kaadlawon kagahapon (Lunes) sa sitio Tapsaw sa Milagrosa dihang gi-ambush sa duha ka mga lalaking armado og high-powered firearms matud pa ni Lt. Col. Marion Sison, ang commander sa 79th IB.

Patay dihadiha si Deliña tungod sa naangkong samad pinusilan sa iyang ulo ug nawong. Ang mga gikatahapan gidudahang mga sakop sa Communist Party of the Philippines-New People’s Army (CPP-NPA) nga daling miikyas ug gidala ang kalibre .45 pistola ug tulo ka magazine, usa ka cellphone ug uban pang gamit sa biktima.

Ang mga gikatahapan gituohang mieskapo sa direksyon sa Nagbalaye River sa sitio Kadlum sa barangay Nagbalaye, sa maong lungsod matud pa ni Lt. Col. Sison.Ang kasundaluhan mipahigayon og hot pursuit operations batok sa mga gikatahapan.

Matud pa ni Lt. Col. Sison, dako ilang pagtuong mga NPA ang mipatay sa biktima sanglit gawas nga usa ka CAFGU si Deliña kabahin gihapon kini sa pagkuha og mga intelligence information alang sa militar, wala hinuon nila isalikway nga dunay laing motibo sa pagpatay.

Ang militar mibutang sa ilang mga tropa sa heightened alert tungod sa nagsingabot nga anibersaryo sa NPA karong Marso 29 ug may pagdudang ang pagpatay kang Deliña kabahin sa posibleng mas dakong opensiba nga ilusad sa mga rebelde, dugang pa ni Sison. (BANATNEWS)