CEBU, Philippines - Pahigpitan ni 6th District Board Member Thadeo Ouano ang pag-monitor sa mga water system ug mineral water dinhi sa lalawigan sa Sugbo aron pagsiguro nga luwas ang panglawas sa publiko nga moinom niini.
Si Board Member Ouano kinsa maoy chairman sa committee on environment sa hunta probinsiyal sa lalawigan sa Sugbo mibutyag sa DYKC nga may eksistido na nga ordinansa ang kagamhanan kalabot niini.
Apan gusto niya nga sa maong ordinansa tinuon nga ang mga water system ug mga water refilling station sa mga mineral water nga gitugotan sa lokal nga kagamhanan sa matag lungsod ug kabarangayan sa lalawigan higpitan ang pag-monitor sa mga hingtungdang otoridad sa matag lugar nga giinstalahan niini.
Matud pa ni Ouano nga gikinahanglan kaayo ang maong lakang ilabi na karong panahona nga daghan na kaayo ang naamong gumikan sa pag-inom og hugaw nga tubig.
Midugang siya nga ubos sa maong ordinansa kinahanglang may komitiba nga tukoron nga tahasan sa pagkontrolar sa mga sudlanan og tubig nga imnonon.
Usa sa angay itahas niini mao ang makanunayong pag-inspection matag karon ug unya sa mga tubig nga anaa sa mga tubo paingon sa kabalayan ug ingon man ang anaa sa mga water refilling station nga gipabarug sa kadaplinan sa kadalanan nga hulog-hulogan lang og tag P1.
.Usa sa gihimong ehemplo ni Ouano mao ang kaso sa tipos nga mihugpa sa lungsod sa Tuburan diin lima ka kinabuhi ang nakalas ug kapin sa usa ka libo ang nataptan sa maong sakit.
Ang tanan nagsukad sa pag-inom og tubig nga nasudlan og kagaw gikan sa hugaw sa tawo. (BANATNEWS)