7 anyos naligo sa lim-aw patay

CEBU, Philippines - Usa ka bata nga dili kaantigo molangoy nalumos samtang naligo   sa usa ka lim-aw didto sa barangay Bunga , dakbayan sa Toledo niadtong Domingo sa hapon.

Ang biktima mao si Dante Montemayor Tangaro Jr., 7 , nga nagpuyo sa maong lugar.

Si SPO3 Carmilito Hornales sa Toledo City Police Station mibutyag sa Banat News nga ang biktima kauban sa laing mga bata nga iyang silingan nga nangaligo sa lim-aw sa ilang barangay atol sa pagbundak sa uwan sa alas 2:00 ang takna sa hapon sa maong adlaw.

Apan sa kaarisgado sa maong bata bisan dili kaantigong molangoy giingong miubog kini ngadto sa lawom nga bahin sa lim-aw.

Apan naglisud na siya sa paghaw-as   sa daplin hangtod nga mitidlom kini sa ilawom sa tubig .

Ang iyang mga kaubang bata kinsa otro usab nga dili kaantigo manglangoy nangahadlok ug nag-iyahay sa pagpanagan pahilayo sa maong lugar ug gibiyaan nalang ang biktima nga wala na mogimaw.

Midangop sila ngadto kang   Jomy Jubatay ug Ignacio Canlom ,pulos mga hingkod kinsa daling miresponde sa hangyo sa kabataan .

Gisawom dayon sa duha ang tunga-tunga sa lim-aw ug milanat pa og 30 minutos ang gidugayon una pa nila hikit-i si Tangaro ilawom sa tubig.

Gisakwat nila ang bata ug gidala sa daplin dayon gisuwayan og apply og first aid apan wala na silay nahimo tungod kay namatay gyud kini.

Padayon pang giimbistigar sa kapolisan ang maong hitabo. (BANATNEWS)