CEBU, Philippines - Usa ka hepe sa departamento sa City hall kinsa supporter ni kanhi mayor ug karon Kongresista Tomas Osmeña gitangtang kagahapon ni Mayor Michael Rama sa katungdanan ug gibalhin sa laing departamento sa City Hall.
Apan dali kaayong gisalikway sa mayor ang katahap nga may labot sa pamolitika ang iyang pagtangtang sa katungdanan ni Cathy Yso, ang hepe sa Department of Social Welfare and Services (DSWS).
Si Yso gihimo nalang karon nga luyo-luyong hepe sa Department of Public Services (DPS) nga gidumala ni Engr. Dionesio Gualiza.
Matud pa ni Rama nga dili angayan nga himoong isyu ang iyang pagtangtang kang Yso sa katungdanan sa DSWS ug gibalhin ngadto sa DPS.
Kini tungod kay matud pa niya nga naandan na kining kalihokan sa City Hall diin ang matag department head himoon nga versatile o kaantigo sa nagkalainlaing katungdanan nga itahas kanila.
Midugang si Rama nga gawas kang Yso aduna pa’y laing mga department head nga ibalhin sa laing division sa sunod nga mga adlaw.
Gihimakak usab niya ang isyu nga politika ang hinungdan niini ilabi na nga si Yso supporter ug suod kaayo ni Kongresista Osmeña.
Si Yso giingong staff ni Osmeña sa dihang kini pa maoy mayor sa Siyudad sa Sugbo.
Apan si Rama miklaro nga wala kini koneksyon sa maong sitwasyon gumikan kay dili niya kinaiya ang paggukod sa mga tawo nga anaa sa pikas nga partido.
Giklaro sa mayor nga nakapunting siya karon sa iyang trabaho busa dili kini angayang hatagan og dautang kolor.
Bisan kun anaa siya sa DPS, si Yso giingong patabangon gihapon ni Rama sa programa sa pagwagtang sa mga tawo nga anha magligid sa mga sidewalk kon aseras ning siyudad magabii kon night dwellers.
Si Yso hulipan ni Ester Cincha kinsa usa ka staff nga gikan sa legislative department isip officer-in-charge sa DSWS.
Si Yso sa iyang bahin nagkanayon nga sa miaging semana pa siya nakadungog nga ibalhin siya og laing departamento apan dili una siya makahatag og komento kalabot niining maong kaugmaran.(/WC) (BANATNEWS)