Talisay BFP may pahimangno sa publiko

CEBU, Philippines - Tungod sa mga sunod-sunod nga insidente sa sunog sa dakbayan sa Sugbo ug Lapu-Lapu si Talisay City Fire Marshal Vondrad Fernando Dublois nanawagan sa publiko nga magmabinantayon kanunay aron malikayan ang sunog.

Gibutyag ni Dublois nga kasagarang hinungdan sa sunog mao ang electrical misuse ug ang pagduwa-duwa sa mga bata og posporo.

Giawhag niya ang publiko nga magmatngon kanunay sama sa pagtangtang sa socket sa mga appliances nga wala gamita ilabi na kung molakaw ug walay mahibilin sa balay ug ang posporo, lighter ibutang kini sa lugar nga dili makawhat sa bata.

Gibutyag sa fire marshal nga niadtong tuig 2010 ang Talisay duna kini 11 ka mga insidente sa sunog ug 17 sa tuig 2011 ug duha gikan sa buwan sa Enero ug Pebrero niining tuiga. Aron paglikay sa sunog ang kabomberohan sa siyudad nagpahigayon og inspection sa mga establisamento.

Ang kabomberohan sa Talisay padayon kini sa pagbansay-bansay kabahin sa pagtubag sa emerhensiya ug gawas sa kaugalingong pagpabansay-bansay mihatag usab sila og mga seminar ug training ngadto sa mga kabarangayan.

Si Dublois nagkanayon nga gipangbisita usab nila ang mga barangay nga mga fire prone areas sama sa mga lugar diha sa barangay Tanke, Cansojong ug San Isidro diin sikit-sikit kaayo ang kabalayan ug mga gama sa mga gaay nga materyal.

Ug kasagaran sa maong lugar usa sa problema niini mao ang magkinabitay lang og linya sa kuryente.

Matud niya nga gamay na lang kaayo ang agianan diha sa barangay Tanke ug dili makasulod ang truck hinungdan nga mipadangat na sila og report niini ngadto sa buhatan nga hingtungdan diha sa city hall aron unta mahawanan ang karsada diha sa maong lugar.

Gawas niini girekomendar usab ni Dublois ang paggama og mga dry hydrant o stand pipe diha sa mga lugar nga gagmay og karsada nga dili na masudlan aron adto na isumpay ang ilang hose dili na sila mogamit og taas pa kaayong hose kung dunay mahitabong sa lugar.

Ang mga fire hydrants usab matud ni Dublois sa ilang pagsusi wala kini mga problema

Ang Talisay City Fire Bureau duna kini tulo ka fire engine truck ug usa ka aerial ladder truck.  - BANAT NEWS