Militanteng pundok nasagmuyo kang Labella

CEBU, Philippines - Gibutyag sa tigpamaba sa Akbayan Partylist - Cebu nga si Mikay Dumaboc nga nasagmuyo siya pag-ayo sa hukom ni Konsehal Edgardo Labella nga adto kini mopasilong sa grupo ni Mayor Michael Rama sa umaabot nga piniliay karong 2013.

Nagkanayon si Dumaboc nga andam unta mosuporta ang iyang grupo kang Labella kinsa modagan pagka-bise mayor apan wala nakapahimuot kanila ang pagpili niini sa grupo ni Rama.

Matud pa niya nga maayo ang performance ni Labella sa konseho hinungdan nga gipangga kini pag-ayo sa mga tawo.

“Maayo ug respetado siya nga policy maker, pinangga siya sa mga tawo pero naa siya nagpasilong sa usa ka kuwestiyonable ang leadership styles,” sumala pa ni Dumaboc.

Giklaro hinuon ni Dumaboc nga i-anunsyo lang nila sa saktong panahon kung kinsa ang ilang suportahan sa umaabot nga piniliay apan ilang gipaneguro nga duna gyud kini kasingkasing alang sa mga kabos.

“Basta ang among suportahan kanang nahigugma sa mga kabus,” matud pa ni Dumaboc.

Samtang una na nga gipadayag nila ni Rama ug Labella kaniadto nga mag-expect na sila daan nga makadawat sila og mga pagsaway samtang nagdagan ang mga adlaw gikan sa pag-anunsyo nila sa ilang tandem.  - BANAT NEWS