NPA gustong mobalik sa Sugbo

CEBU, Philippines - Gipanid-an karon sa Central Command sa Armed Forces of the Philippines ang tulo ka mga lungsod ug usa ka component city sa lalawigan sa Sugbu tungod sa mga report nga ang New People’s Army nagplanong mabalik ang impluwensya sa maong mga lugar.

Si Lt. Col. Christopher Tampus, ang tigpamaba sa AFP- Central Command, nagkanayon nga ang ilang gipanid-an mao ang mga lungsod sa Pinamungajan, Aloguinsan, San Remigio ug Toledo City.

Ang 78th Infantry Battalion maoy gitahasan sa pagpaniid sa mga kalihukan sa maong mga lugar.

Matud pa ni Tampus pipila sa mga nadakpang mga rebelde sa Negros Oriental nakuhaan og mga computer ug drawing boards nga dunay impormasyon sa plano sa pagbalik sa NPA sa Cebu. “Part of their plan is to recover Cebu and also Bohol but it will remain only as a plan,” matud pa ni Tampus sa The Freeman ang igsuong pamantalaan sa Banat News.

Dugang pa ni Tampus nga ang pangandoy nalang ang naa karon sa NPA kung ang plano niini nga makabalik dinhi sa Sugbu tungod kay sa pagkakaron ang gobiyerno ug ang mga lokal nga kagamhanan adunay lig-ong kooperasyon.

Dili palang dugay, si Lt. Col. Nolasco Mempin, ang battalion commander sa Philippine Army 78th Infantry Battalion mibutyag nga nagsugod na og rekrut ang NPA ug mga tinun-an sa high school dinhi sa Cebu.

Ang 78th IB mipakatap na og unom ka mga team nga naniid sa Midwest Cebu ug Northern Cebu, diin giingong adunay daghang mga tinun-an sa high school ang giingong na-rekrut na sa militanteng grupo sa League of Filipino Students (LFS).

Duha ka tuig na ang nakalabay dihang ang Cebu gideklarar nang “insurgency free” maong gipasa sa AFP sa kapolisan ang pagbantay sa seguridad ug sa mga lokal nga kagamhanan.

Ang Civil Relations Service sa AFP nagpadayon karon sa ilang mga kalihokan sa pag-agni sa mga local nga mga rebelde aron mobalik sa sabakan sa balaod.

Giawhag usab sa military ang mga ginikanan sa pagbantay sa ilang mga anak ilabi na kung dunay mga naglihok nga kadudahang grupo sa ilang mga lugar.

Ang Central Command mimando na usab sa nagkadaiyang lokal army units sa pagpahigayon og mga kampanya ug pagpakatap og impormasyon ilabi na sa mga tunghaan ug mga umahan nga maoy target karong ma-rekrut sa NPA.

Hinuon gibutyag sa Centcom nga wala pay nabantayang grupo sa mga NPA nga nakasulod og balik dinhi sa Sugbu.  - BANAT NEWS