Castro balik sa Talisay

CEBU, Philippines - Si Cebu City Assistant Prosecutor Mary Ann Castro nahibalik na sa dakbayan sa Talisay isip assistant prosecutor gihapon.

Temporaryo siyang mohulip ni Assistant Prosecutor William Canta kinsa nag-indefinite leave karon.

Niadtong Disyembre 15, 2011 si Justice Secretary Leila de Lima miluwat og kamanduan sa pagdestino kang Castro sa Talisay City Prosecutors Office aron makatabang sa prosekusyon   sa   pag-atiman sa mga kaso nga nagtipon-og sa maong buhatan.

Si Castro milingkod sa maong katungdanan sugod niadtong Pebrero 1, 2012 busa nagkapuliki siya sa pag-atiman sa iyang tahas nga alang kaniya wala ug tuo ilabi na nga aduna pa siya’y mga kaso nga tambongan sa korte sa dakbayan sa Sugbo isip assistant prosecutor usab sa maong siyudad.

Nahimo siyang acting Talisay City Prosecutor gikan sa tuig 2004 ngadto sa 2005 hangtud nga nadestino kini sa dakbayan sa Sugbo.

Sa laing bahin, human sa siyam ka buwan nga pagkasuspenso nahibalik na sa iyang trabaho si Talisay City Sangguniang Panglungsod Secretary Emigdio Enjambre Jr niadtong Marso 1, 2012.

Si Enjambre namahad nga ipadayon gihapon niya ang legal nga pakig-away kabahin sa iyang kaso.

Matud niya nga aduna pa siya’y pending motion for reconsideration ug nanghinaot siyang ma-desisyonan kini sa daling panahon.

 Nagkanayon ang SP Secretary nga kung ang buhatan sa Ombudsman Visayas mipaubos pa sa iyang silot bisan lang og usa ka buwan makalihok pa unta siya aron mabasura ang kasong gipasaka batok kaniya. Hangtud karon padayon gihapong gihimakak ni Enjambre ang pasangil ni Loreto Powao batok kaniya nga usa ka “personal” ug dili unta angayang makaapekto sa iyang pagka-public official.

Sayo niini si Powao kinsa nanag-iya og machine shop sa Tabunok mipasaka og kasong grave misconduct ug conduct unbecoming of a public employee batok kang Enjambre ngadto sa Ombudsman Visayas.

Ang engkwentro ni Enjambre ug Powao nahitabo niadtong Marso 13, 2009 dihang giingong si Enjmabre mihulgang pasirad-an niini ang machine shop ni Powao nga maoy nakaaghat sa naulahi sa pagpasaka og kiha batok sa nahauna.

Ang SP Secretary naglaum nga ang anti-graft court mohatag og ruling kabahin sa iyang gidusong motion pabor kaniya.

Kun kini mahitabo, matud pa ni Enjambre nga makapangayo siya og back pay sa siyam ka buwan niyang pagkasuspenso nga walay sweldong nadawat.  - BANAT NEWS