Duha ka tawo nalumos

CEBU, Philippines - Duha ka tawo ang nakabsan sa kinabuhi gumikan sa pagkalumos sa dagat sa managlahing lugar sa lalawigan sa Sugbo kagahapon ug sa miaging Biyernes.

Ang mga biktima nailhan nga sila si Yergranny Panes, 23, lumad nga taga Pagadian City ug temporaryong nagpuyo sa barangay Talamban, dakbayan sa Sugbo, ug Reuben Salcedo Tudtud, hingkod, ulitawo, nga taga barangay Labangon, dakbayan sa Sugbo.

Si Panes didto nalumos sa Bas Dako Beach Resort sa barangay Saavedra , lungsod sa Moalboal kagahapon sa alas 2:00 sa kaadlawon, samtang si Tudtud didto nalumos sa Green Lagoon Beach Resort sa barangay Canamocan, lungsod sa Compostela ala 1:00 pasado ang takna niadtong Biyernes sa hapon.

Si P01 Melvin Delica sa Moalboal Police Station mibutyag nga si Panes kuyog sa iyang mga paryente nga nangaligo sa Bas Dako Beach Resort niadtong Sabado sa gabii. Apan una sila motugsaw sa dagat, nag-inom una ang grupo agi og lingaw-lingaw sa maong higayon.

Sumala ni P01 Delica nga sa didto na sila sa dagat, nag-iyahay na og langoylangoy ang grupo kauban sa biktima.

Apan dihang nanghaw-as na ang tanan, ang biktima mao nalay wala nila makita hinungdan nga kagahapon sa buntag misayo sila sa pagpahibawo sa kapolisan kalabot sa pagkawagtang sa biktima.

Dihang milihok ang kapolisan, nakit-an na nila kagahapon sa alas 11:00 sa buntag nga naglutawlutaw na sa dagat ang biktima nga wala nay kinabuhi   dili layo sa ilang gikaligoan nianang Sabado sa gabii. Samtang si Tudtud kauban sa iyang mga higala nga kauban sa klase nga naglingaw-lingaw kay mograduwar na sila karong sunod semana sa pagtungha nila sa kolehiyo.

Apan samtang nalingaw og kaligo ang grupo, namatikdan nila nga nawala na ang biktima sa ilang palibot.

Gipangita nila kini hangtod niadtong   Biyernes sa gabii apan niadto nang Sabado sa buntag nila hipalgi ang biktima nga naglutaw na sa ilang gikaligoan nga wala nay kinabuhi.

Gidala sa mga kauban ngadto sa Danao District Hospital diin didto ideklarar nga patay na kini

Ang kapolisan sa Moalboal ug Compostela mideklarar nga pulos walay foul play ang kamatayon sa mga biktima.  - BANAT NEWS