Ang E-Jeep sa Mandaue

CEBU, Philippines - Ang pagsaka sa presyo sa lana gumikan sa dili kapugngang mga hinungdan sa kalibutanong merkado nakahatag og kahasol sa tanan, drayber, operators, sumasakay ug sa kinatibuk-an, sa konsumidor.

Daghan nang mga gisuwayang mga imbensyon nga kuno makapamenus sa gastos sa enerhiya ilabi na sa matang sa transportasyon. Kini sama sa mga electronic cars, electronic trains o electric train, duna nay solar powered aircraft, solar powered car, solar powered nga barko ug uban pa.

Dinhi sa Metro Cebu, ang Mandaue City mipailaila sa ilang labing unang electric jeep nga mao karoy sakyan sa mga mangumprahay sa bag-ong merkado sa maong dakbayan diha sa sitio Tribunal sa barangay Centro.

Libre ang serbisyo sa maong electric jeep maong sakyan gyud kini sa mga tawo nga buot mangompra. Apan usa kini sa paagi sa dakbayan aron makaagni og mga pumapalit sa maong bag-ong merkado.

Si Musoline Suliva nga maoy city market administrator dihang nahinabi sa Banat Manobela mipadayag dili hinuon sa tanang oras ang biyahe sa duha ka electric jeeps kini sa alas- 6 sa buntag hangtod kini sa alas- 2 sa hapon ug laing electronic jeep mosugod usab sa iyang pagbiyahe alas-2 sa hapon hangtud sa alas-7 ang takna sa gabii.

Aron di ikatingala sa uban, sahi sa de-gasolina ug de-krudong sakyanan, baterya ang gigamit sa electric jeep. Ang usa mobiyahe aron maka-charge sa baterya ang usa alang sa torno niini pagbiyahe.  

Ang maong sakyanan gibanabanang mokantidad og P600,000 ug didto kini gipalit sa nasud sa Japan. Ang nakanindot niini wala kay gastos sa lana, environment friendly tungod kay wala kini aso o tambutso ug walay saba.

“Bisan sa pag-usbaw sa presyo sa matag litro sa gasolina ug krudo ang electric jeep sa Mandaue City dili maepektohan kay wala man magkinahanglan pa nga magpatubil,” ni Suliva pa.

Dugang pa ni Musoline nga giplano na karon ni Mayor Jonas Cortes nga mopalit og dugang pa nga e-jeeps ang dakbayan aron magamit sa mga tinun-an nga libreng school bus sa kabarangayan.

Gawas sa dakbayan sa Mandaue dunay usa ka hotel sa Lapulapu City nga nagtanyag og susamang matang sa sakyanan alang sa ilang mga guests.

Kung hatagan og panahon ug pundo sa gobiyerno ug ipokus ang konsentrasyon sa pag-invest alang sa susamang mga matang sa transportasyon dako kini og matabang sa kaugmaon sa nasud.

Dako unya ang pagmenus sa polusyon gikan sa aso sa mga sakyanan, walay saba ang kadalanan, ug labaw sa tanan dili na kita maapektahan pa sa pagsaka sa presyo sa petrolyo bisan unsa pay mahitabo sa ubang nasud.

Wala na unyay mga mag-protesta pinaagi sa transport strikes kun ang mga pasaheroan de baterya na ug dunay kaugalingong electric transport system ang atong mga lokal nga kagamhanan.( /EIM) (BANATNEWS)