Kalihokan sa konseho ipa-BARUGG

CEBU, Philippines - Gipahimangnoan sa konseho sa Siyudad sa Sugbo si Public Information Officer Carlo Dugaduga nga kinahanglang ilakip usab ang mga kalihukan sa lehislatiba sa mga ipublikar sa Bayanihan Advocates Rallying for Unity and Good Governance (BARUGG).

Kini pinaagi sa pagpaatubang kang Dugaduga sa konseho ug gipaeksplikar kung unsa gyud ang nag-una niya nga trabaho sa city hall.

Si Konsehal Alvin Dizon nakabantay nga kasagaran sa mga artikulo nga namantala sa BARUGG pulos lamang mga kalihukan ni Mayor Michael Rama. Matud pa ni Dizon nga kinahanglan nga patas si Dugaduga sa iyang trabaho sanglit sa siyudad sa Sugbo kini nagtrabaho.

“Dili man lang kay sa mayor ra siya nagtrabaho, ang City Council part man pud sa City Government,”matud pa ni Dizon. Misugyot usab si Dizon nga kinahanglan nga palamboon ang BARUGG gumikan kay nabantayan niya nga adunay pipila ka bahin sa artikulo may ginagmay’ng   sayop sa grammar.

Samtang si Konsehal Margarita Osmeña mihulagway sa maong publikasyon sa City Hall nga dili makiangayon sanglit adunay pipila ka artikulo ang nangatake sa konseho.

Matud pa ni Osmeña nga kinahanglan nga kuhaan usab ni Dugaduga og habig ang konseho kinsa adunay mga pangatake batok niini nga ipatik sa BARUGG.

Midugang si Osmeña nga mura na og “diary” ni Rama ang nahisgutang news letter.

Nasayran usab nga adunay pulong-pulong nga gihimo sa PIO sa nagkadaiyang barangay aron sa pagsabwag sa mga kalihukan sa City Hall ug nanghinaut ang konseho nga ilakip usab niini ang pagpakatap og impormasyon sa mga kalihukan sa mga konsehal.

Si Dugaduga nagkanayon nga iyang gibutang sa iyang hunahuna ang mga sugyot sa mga konsehal ug misaad nga ipaapil niya pagmantala sa BARUGG ang mga kalihukan sa konseho .

Matud pa niya nga adunay panahon nga menus ang mga balita sa konseho gumikan kay nag-agad ra usab siya sa mga balita nga ipasa silbing reporter nga maoy gidestino nga mosuwat sa mga kalihukan sa konseho. (BANATNEWS)