Drayber sa nalimbuwad nga bus mitahan

CEBU, Philippines - Mitahan na sa kapulisan ang drayber sa Calvo Bus Liner nga nalimbuwad sa barangay Mainit siyudad sa Naga nga miresulta sa pagkaangol sa 28 ka mga pasahero dihang nisuway kini og overtake ug nagkabangga sa laing sakyanan una pa nalimbuwad niadtong niaging buntag.

Ang drayber sa maong bus liner nga daling nisibat human sa hitabu mipatin-aw sa buhatan sa Naga Police Station kagahapon sa alas 10:50 sa buntag.

Matud ni PO2 Ken Cabrera sa Naga City Police Station dihang nahinabi sa Banat News ang maong drayber nga mipatin-aw sa ilang buhatan nailhan nga si Marcial Velasquez Canillo, 30, molupyo sa barangay Talavera siyudad sa Toledo .

Iyang gitug-an sa gihimong pagsukitsukit sa kapulisan nga wala dayon siya mopakita tungod kay pagkahuman sa hitabo mipauli siya sa Talavera aron magpatambal sa iyang gamay’ng samad sa ulo tungod sa hitabo.

Ang maong drayber maoy gibasol nga sad-an sa panghitabo tungod kay misuway kini og overtake sa gisundang sakyanan apan naatol nga dunay gikasugat nga nisangpot sa ilang panagbangga ug pagkalimbuwad sa bus.

Moabot 28 ka mga pasahero ang naangol sa maong aksidente apan wala dayun mailhi ang drayber tungod kay misibat kini ug wala na maabti sa mga polis nga miresponde.

Ang kapulisan gitakdang mopasaka og kaso batok sa maong bus liner drayber.(/EIM) (BANATNEWS)